რაც გარდაუვალია, იმაზე ნერვიულობა არ ღირს - გია მურღულის
თუ სირბილში სამყაროს უნდა გაეჯიბრო, ფეხებზე გირებს ნუ მიიმაგრებ - ნერვიულობა მძიმე და უსარგებლო ტვირთია,- ამის შესახებ ფილოლოგი, გია მურღულია სოციალურ ქსელში წერს.
„რაც გარდაუვალია, იმაზე ნერვიულობა არ ღირს - თუ წინასწარ ცნობილია, რომ ვერცერთი ძალისხმევით და ვერცერთ შემთხვევაში ვერაფერს გააწყობ, რომელი იმედი უნდა გაგიცრუვდეს?
იმის გამო ხომ სულ არ ღირს ცუდ ხასიათზე დადგომა, რისი არიდება, შეცვლა თუ გამოსწორებაც შეიძლება - უბრალოდ აირიდე, შეცვალე ან გამოასწორე.
სიმშვიდე გამარჯვების დიდი წილია - ვისაც საკუთარი თავის არ სწამს და სჯერა, მისთვის ძნელია (ალბათ, შეუძლებელიც) ნებისმიერ საქმეში წარმატების მიღწევა.
კარგად გააკეთე ის, რაც შეგიძლია - ამისთვის სრულად უნდა ფლობდე საკუთარ თავს, რათა მაქსიმალური კონცენტრაციით იმოქმედო.
თუ სირბილში სამყაროს უნდა გაეჯიბრო, ფეხებზე გირებს ნუ მიიმაგრებ - ნერვიულობა მძიმე და უსარგებლო ტვირთია.
დაივიწყე რამეზე შფოთვა და მოთოკე ეჭვი, თუ გსურს, წარუმატებლობამ დაგივიწყოს.
სწორედ მაშინ გამოამჟღავნებ სრულფასოვნად, რაც იცი და შეგიძლია.
მაგალითად - დღეს“,- წერს გია მურღულია.
