"ფანჯრები შემოანგრია, ეზოს მხარეს ვნახეთ, რომ დიდი ნგრევა იყო... მთელი კორპუსი ევაკუირებულია, ახლაც ვერ შევდივართ" - რას ამბობს მხატვარი სამტრედიის ქუჩაზე მომხდარ აფეთქებაზე?
ძლიერი აფეთქება მოხდა წუხელ დიდუბის რაიონში, სამტრედიის ქუჩა #2-ში. მომხდარის შედეგად დაზიანებულია ახლომდებარე კორპუსებში ფანჯრების მინები, ასევე ავტომობილები.
აფეთქება სავარაუდოდ, ბუნებრივი აირის გაჟონვამ გამოიწვია და მომხდარის შედეგად არავინ დაშავებულა. საცხოვრებელი კორპუსის მოსახლეობა დროებით სასტუმროებში დაბინავდა.
გამთენიისას, საცხოვრებელ კორპუსში ძლიერი აფეთქება გამო, საცხოვრებელი კორპუსის მოსახლეობა დროებით სასტუმროებში დაბინავდა.
"კორპუსის მდგომარეობის შესწავლის შემდეგ, ცნობილი გახდება, ადგილობრივი მოსახლეობა საცხოვრებლად აღნიშნულ კორპუსს დაუბრუნდება, თუ კორპუსის გამაგრებამდე დროებით ქირით გადაიყვანენ.
პირველივე წუთებიდან, ადგილზე მობილიზებულები არიან როგორც შსს-ს საგანგებო სიტუაციების მართვის სამსახურისა და შესაბამისი უწყებების თანამშრომლები, ისე დედაქალაქის მერიისა და დიდუბის რაიონის გამგეობის წარმომადგენლები" - აღნიშნულია თბილისის მერიის მიერ გავრცელებულ ინფორმაციაში.
კორპუსში, სადაც აფეთქება მოხდა, მხატვარი დავით ხიდაშელი ცხოვრობს, რომელიც AMBEBI.GE-სთან მძიმე შემთხვევას იხსენებს:
- დაახლოებით ღამის სამ საათზე საშინელი აფეთქების ხმა იყო. ფანჯრები შემოანგრია, ეზოს მხარეს ვნახეთ, რომ დიდი ნგრევა იყო... პირველი და მეორე სართული შუა სადარბაზოსი პრაქტიკულად განადგურებული იყო.
ძალიან დიდი პანიკა იყო, ევაკუირება მოხდა მთელი კორპუსის. ჯერჯერობით ისევ გამოსულები ვართ... კი გვითხრეს, დაბრუნება შეიძლებაო, მაგრამ არც წყალი, გაზი ჩართული არ არის და შესაბამისად ისევ აქ ვრჩებით. პირველ სართულზე კომერციული ფართია და როგორც ვიცით, იქ რემონტი მიმდინარეობდა.
- იქ მოხდა რამე ისეთი, ამან გამოიწვია ნგრევა?
- არ ვიცი, ვერაფერს ვიტყვით. ალბათ დაადგენენ ოფიციალურად რაც იყო მიზეზი. ყოველ შემთხვევაში, ცეცხლი არ ყოფილა, აფეთქება იყო... ამჟამად გახიზნულები ვართ და კონტაქტი მეზობლებთან ჯერ არ გვქონია.
