მსჯავრდებულები სპორტის სხვადასხვა სახეობაში მწვრთნელის პროფესიას დაეუფლებიან

სპეციალური პენიტენციური სამსახური სპორტის მართვის სტრატეგიის ფარგლებში, დაწესებულებებში ჯანსაღი ცხოვრების წესის ხელშეწყობას განაგრძობს. ამ მიზნით სპეციალურ პენიტენციურ სამსახურსა და სსიპ „საქართველოს ფიზიკური აღზრდისა და სპორტის სახელმწიფო სასწავლო უნივერსიტეტს“ შორის ურთიერთთანამშრომლობის მემორანდუმი გაფორმდა.

მემორანდუმი ხელს უწყობს დაწესებულებებში სპორტულ-გამაჯანსაღებელი პროგრამების განვითარებას/ხელშეწყობას და სპორტის სხვადასხვა სახეობაში დარგის სპეციალისტების/ექსპერტების მიერ მსჯავრდებულების ინსტრუქტორებად მომზადებას/გადამზადებას.

ურთიერთთანამშრომლობის მემორანდუმს ხელი მოაწერეს სპეციალური პენიტენციური სამსახურის ხელმძღვანელმა ნიკა ცხვარაშვილმა და საქართველოს ფიზიკური აღზრდისა და სპორტის სახელმწიფო სასწავლო უნივერსიტეტის რექტორმა ტრისტან გულბიანმა.

უნივერსიტეტთან თანამშრომლობის ფარგლებში, სპორტის ოთხ სახეობაში – ფეხბურთში, კალათბურთში, ხელბურთში, მაგიდის ჩოგბურთში – №5, №12 და №16 პენიტენციური დაწესებულებების მსჯავრდებულებმა მწვრთნელებად მომზადების მოკლევადიანი კურსი პროფესიონალი მწვრთნელის დახმარებით უკვე გაიარეს. პროგრამაში ჩართულ მსჯავრდებულებს სერტიფიკატებიც გადაეცათ და ისინი დასაქმებას შეძლებენ მწვრთნელის შესაბამის პოზიციაზე, როგორც პენიტენციურ სისტემაში, ისე გათავისუფლების შემდგომ.

პენიტენციური სამსახური ფიზიკური აქტივობის ხელშეწყობას და დაწესებულებების თანამედროვე სპორტული ინვენტარით აღჭურვის პროცესს კვლავ გააგრძელებს.