უმაღლესმა რადამ მობილიზაციის შესახებ კანონპროექტი დაამტკიცა

უმაღლესმა რადამ მობილიზაციის შესახებ კანონპროექტი დაამტკიცა. შესაბამის ინიციატივას 283-მა დეპუტატმა მისცა ხმა. ამის შესახებ ფინანსური კომიტეტის თავმჯდომარის მოადგილე, პარტია „გოლოსის“ წევრი იაროსლავ ჟელეზნიაკი ტელეგრამ-არხში წერს.

უმაღლესი რადას მიერ დამტკიცებული კანონპროექტი მობილიზაციის, სამხედრო აღრიცხვისა და სამხედრო სამსახურის გავლის საკითხებს არეგულირებს. ამასთან, საკანონმდებლო ინიციატივა ქვეყანაში ზოგადი სამხედრო მომზადების შემოღებას ითვალისწინებს. 2025 წელს ის უმაღლეს სასწავლო დაწესებულებებში დაინერგება.

მანამდე ცნობილი გახდა, რომ დეპუტატებმა მობილიზაციის შესახებ კანონპროექტიდან სამხედროების დემობილიზაციისა და როტაციის დებულებები ამოიღეს. უკრაინული მედიის ცნობით, დოკუმენტიდან დემობილიზაციის საკითხის ამოღება უკრაინის შეიარაღებული ძალების მთავარსარდლის, ალექსანდრ სირკის ინიციატივით მოხდა.

შესაბამისი პუნქტი ითვალისწინებდა სამხედრო სამსახურიდან იმ პირების გათავისუფლებას, რომლებმაც საომარი მდგომარეობის განმავლობაში 36 თვე იმსახურეს.

ამასთან, უკრაინის უმაღლესმა რადამ გუშინ პირველი მოსმენით მიიღო კანონპროექტი, რომლითაც შესაძლებელი ხდება სამხედრო სამსახურისთვის პატიმრების ნებაყოფლობითი მობილიზება. კანონპროექტი ითვალისწინებს საომარ მოქმედებებში მსჯავრდებულთა ნებაყოფლობით მონაწილეობას.