გთავაზობთ, „ოჯახური ღირებულებები“ შევცვალოთ „ქართული ღირებულებებით“ - ფრიდონ ინჯია

მე, როგორც ოპოზიციური პარტიის თავმჯდომარეს, არ მიმაჩნია რომ უნდა იყო ხელისუფლების და იმ კარგი საქმეების წინააღმდეგი, რასაც აკეთებს დღეს ეს ხელისუფლება, – განაცხადა ფრაქცია „ევროპელი სოციალისტების“ თავმჯდომარემ, ფრიდონ ინჯიამ „საქართველოს კონსტიტუციაში ცვლილების შეტანის შესახებ“ და „ოჯახურ ღირებულებათა და არასრულწლოვანთა დაცვის შესახებ“ საქართველოს კონსტიტუციურ კანონპროექტებთან დაკავშირებით საყოველთაო-სახალხო განხილვაზე ქუთაისში.

„ჩემი შეხედულებით, მე შევცვლიდი და „ოჯახური ღირებულებების“ ნაცვლად ჩავწერდი –  „ქართული ღირებულებები“. რატომ? ყველა ქვეყანას თავისი ღირებულებები აქვს და ზოგიერთ ოჯახურ ღირებულებებს სხვადასხვა ქვეყნებში, მათი გადასახედიდან აქვს ისეთი მნიშვნელობა, რომლებიც ჩვენთვის სრულიად მიუღებელია. ამიტომ, გთავაზობთ განხილვისთვის –  სიტყვები „ოჯახური ღირებულებები“ შევცვალოთ „ქართული ღირებულებებით“ –  ამაში ოჯახური ღირებულებებიც არის, ის ტრადიციებიც, ის ძალაც, რომელიც ყველა ქართველის სულშია და რომელმაც გადაარჩინა საქართველო. საუკუნეების წინ იყო იმპერიები, დღეს მათგან არაფერი დარჩა. ქართველი კაცი და ქართული სახელმწიფო იქნება იქამდე, ვიდრე დედამიწა იტრიალებს“, – განაცხადა ფრიდონ ინჯიამ.

ქუთაისში, საკონსტიტუციო ცვლილებების საყოველთაო-სახალხო განხილვა მიმდინარეობს. მოსახლეობასთან შეხვედრები საქართველოს სხვადასხვა ქალაქში გაიმართება.