სალომე ზურაბიშვილის ახალი შეთქმულების თეორია იმავე მარცხს განიცდის, როგორც ადრე მისმა ინიციატივებმა განიცადა - გურამ მაჭარაშვილი
პარტია „ხალხის ძალის“ აღმასრულებელი მდივნის გურამ მაჭარაშვილის თქმით, სალომე ზურაბიშვილის ინიციატივები სიმართლეს და ქვეყანას არ ემსახურება.
„სალომე ზურაბიშვილი წვალობს, ხან მედიას დაიბარებს, შუამავალი ვიქნებიო, ხან ოპოზიციას ეუბნება მშვიდობის მტრედი ვიქნებიო, ხან უცხოელებს ეუბნება, საქართველოს რადიკალიზმში გადავიყვან და თქვენ პოლიტიკაში გამიშვითო. ახლა ახალი შეთქმულების თეორიით გამოვიდა, რაც იმავე მარცხს განიცდის, როგორც ადრე მისმა ინიციატივებმა განიცადა, რადგან ემსახურება არა სიმართლეს და თავის ქვეყანას, არამედ უსამართლობას და უცხო ქვეყანას“, – განაცხადა გურამ მაჭარაშვილმა.
ორბელიანების სასახლესთან გამართულ ღონისძიებაზე სალომე ზურაბიშვილი 26 ოქტომბერს დროებითი პარლამენტის არჩევისა და მთავრობის ახალი მოდელის ინიციატივით გამოვიდა, რომელიც პოლიტიკური პარტიებისგან არ იქნება დაკომპლექტებული. სალომე ზურაბიშვილმა პოლიტიკურ პარტიებს „ქართულ ქარტიაზე“ ხელმოწერა შესთავაზა.
