ახალი ევროპარლამენტი ევროკომისიის პრეზიდენტს 18 ივლისს აირჩევს - Politico

ევროპარლამენტში ევროკომისიის პრეზიდენტის არჩევნები, სავარაუდოდ, 18 ივლისს არის დაგეგმილი.

ამის შესახებ Politico-ს ევროკავშირის ორმა ოფიციალურმა პირმა განუცხადა.

ევროკომისიის პრეზიდენტის კენჭისყრის თარიღი ევროპარლამენტის გენერალურმა მდივანმა ალესანდრო ჩიოჩეტიმ პარასკევს, წევრი ქვეყნების მუდმივ წარმომადგენლებთან შეხვედრისას გამოაცხადა.

Politico-ს ერთ-ერთმა წყარომ განუმარტა, რომ საბოლოო გადაწყვეტილება ჯერ მიღებული არ არის, მაგრამ სავარაუდო თარიღი 18 ივლისია, ევროპარლამენტის თავმჯდომარის არჩევიდან ორი დღის შემდეგ.

ბოლო კვირებში მიმდინარეობდა მსჯელობა იმის შესახებ, შეეცდებოდა თუ არა ევროპარლამენტი ევროკომისიის პრეზიდენტის არჩევას ივლისის პირველ შეხვედრაზე, თუ სექტემბერს დაელოდებოდა.

ამ თანამდებობის დასაკავებლად კანდიდატმა ჯერ ევროკავშირის ლიდერების კვალიფიციური უმრავლესობის მხარდაჭერა უნდა მიიღოს და შემდეგ ევროპარლამენტის 720 წევრიდან მინიმუმ 361-ის ხმა მოიპოვოს.

ევროკავშირის ლიდერები კანდიდატის მხარდაჭერის შესახებ გადაწყვეტილებას ევროპული საბჭოს სხდომაზე, 27-28 ივნისს მიიღებენ. შემდეგ დისკუსია ევროპარლამენტის პოლიტიკურ ჯგუფებზე გადავა, რომელიც 11 ივლისს დასრულდება.

ამავდროულად, ევროკომისიის ამჟამინდელ პრეზიდენტს, ურსულა ფონ დერ ლაიენს, შესაძლოა არ ჰქონდეს საკმარისი ხმები მეორედ ამ თანამდებობის დასაკავებლად, რადგან ევროპარლამენტის ახალი შემადგენლობაში მისი მხარდამჭერი პოლიტიკური ჯგუფების წარმომადგენლობა შესაძლოა ნაკლები იყოს.

თუმცა, ამ თანამდებობის დაკავების აშკარა ფავორიტად ევროკომისიის მოქმედი ხელმძღვანელი რჩება, რადგან ის "ევროპის სახალხო პარტიის" კანდიდატია, რომელიც არჩევნებში პირველ ადგილს დაიკავებს.