მალავის ვიცეპრეზიდენტი ავიაკატასტროფაში გარდაცვლილად გამოაცხადეს
მალავის ვიცეპრეზიდენტი 51 წლის საულოს ქილიმა გარდაცვლილად გამოაცხადეს მას შემდეგ, რაც ავიაკატასტროფის შედეგად ჩამოვარდნილი მისი თვითმფრინავის ნაშთები ტყეში აღმოაჩინეს. სამაშველო რაზმებმა შემთხვევის ადგილიდან ვერცერთი გადარჩენილი ადამიანი ვერ ამოიყვანეს.
ვიცეპრეზიდენტის ავიაკატასტროფაში დაღუპვის შესახებ ინფორმაცია მალავის პრეზიდენტმა ლაზარუს ჩაკვერამ გაავრცელა. როგორც ცნობილია, თვითმფრინავში მალავის ვიცეპრეზიდენტის გარდა კიდევ 9 ადამიანი იმყოფებოდა. ვიცეპრეზიდენტი მალავის საზღვრებს შიგნით სამხედრო თვითმფრინავით გადაადგილდებოდა. სპეციალისტების აზრით, ავიაკატასტროფა ცუდმა მეტეოროლოგიურმა პირობებმა გამოიწვია.
სამხედროები სამაშველო ჯგუფებთან ერთად ვიცეპრეზიდენტის თვითმფრინავს 10 ივნისიდან ეძებდნენ. საბოლოოდ, თვითმფრინავის ნარჩენები ჩიკანგავას ტყეში აღმოაჩინეს.
