სააკაშვილის წინ წამოწევა და პოლიტიკური პროცესების სათავეში მოყვანა ძალიან რთულია, ეს სალომე ზურაბიშვილსაც ხელს შეუშლის - გია ვოლსკი
პარლამენტის პირველი ვიცე-სპიკერი გია ვოლსკი მიხეილ სააკაშვილის შეწყალების საკითხზე აცხადებს, რომ ყველაფერი შესაძლებელია, თუმცა ამავდროულად ამბობს, რომ „ნაცმოძრაობის“ რომელიმე ფრთას სააკაშვილის დასაცავად აქტიური პოზიცია არ გამოუხატავს.
ამასთან, როგორც ვოლსკიმ აღნიშნა, სააკაშვილის წინ წამოწევა, პოლიტიკური პროცესების სათავეში მოყვანა რთული იქნება და ეს სალომე ზურაბიშვილსაც ხელს შეუშლის.
"ყველაფერი შესაძლებელია, მაგრამ აშკარა პრობლემაა, რომ არც მიშა სააკაშვილის თემით პარტიის ლიდერად მოსულ ხაბეიშვილს და არც „ნაცმოძრაობის“ რომელიმე ფრთას სააკაშვილის დასაცავად აქტიური პოზიცია არ გამოუხატავს, განსაკუთრებით მას შემდეგ, რაც სტრასბურგის სასამართლომ დაადასტურა, რომ დამნაშავესთან გვაქვს საქმე და რაც აქამდე მოვიფიქრეთ, სიმულანტობა იყოო.
სააკაშვილის წინ წამოწევა და პოლიტიკური პროცესების სათავეში მოყვანა ძალიან რთულია. რასაკვირველია, ეს სალომე ზურაბიშვილსაც შეუშლის ხელს, განსაკუთრებით მას შემდეგ, თუ გავიხსენებთ, როგორი უწმაწური და ბილწი გამონათქვამები იყო სალომე ზურაბიშვილის მიმართ „ნაცმოძრაობის“ წევრების მიერ და პირადად სააკაშვილისგან“, – აღნიშნა გია ვოლსკიმ.
საქართველოს პრეზიდენტმა, სალომე ზურაბიშვილმა გუშინ ახალგაზრდებთან შეხვედრაზე დასმულ კითხვას, აპირებს თუ არა სააკაშვილის შეწყალებას, ასე უპასუხა:„ევროპასთან ჩვენი სიახლოვე თუ დამოკიდებულია ჩემს შეწყალებებზე, უკვე შესული და იქითკენ გასული უნდა ვიყოთ“.
