რა ქონებას ფლობს სალომე ზურაბიშვილი?

საქართველოს პრეზიდენტმა სალომე ზურაბიშვილმა ქონებრივი დეკლარაცია მიმდინარე წლის 1-ელ იანვარს შეავსო.

დოკუმენტის მიხედვით, პრეზიდენტი ფლობს მხოლოდ ბინას საფრანგეთში და საცხოვრებელ სახლს საქართველოში. კერძოდ, პარიზში მდებარე 60 კვ.მ ბინაში სალომე ზურაბიშვილს, 1989 წელს, 150 000 ევრო აქვს გადახდილი, ხოლო თბილისში, 235 კვ.მ საცხოვრებელ სახლში (2006 წელს) 160 000 აშშ დოლარი.

რაც შეეხება ფინანსურ მდგომარეობას, დეკლარაციის მიხედვით, დოკუმენტის შევსების მომენტში პრეზიდენტს société générale Paris-ის ანგარიშზე ჰქონდა 26 840 ევრო, “საქართველოს ბანკის“ სახელფასოზე 3 375 ლარი და 9,58 ევრო, ხოლო, ანაბარზე 25 460 აშშ დოლარი.

დეკლარაციის თანახმად, სალომე ზურაბიშვილს, გასულ წელს პრეზიდენტის პოსტზე ხელფასის სახით 84 220 ლარი აქვს მიღებული.

ამასთან, პრეზიდენტმა ქველმოქმედებაზე 55 275 ლარი დახარჯა, ხოლო ევროპაში ვიზიტების განსახორციელებლად გაწეულმა პირადმა ხარჯებმა 48 217 ლარი შეადგინა.