„ჩემო ტკივილო და სამუდამო სევდავ, დღეს 27 წელი შეგისრულდებოდა მტარვალს რომ არ გამოესალმებინე სიცოცხლეს“ – რას წერს თამარ ბაჩალიაშვილის დედა?
„23 წელი გვაბედნიერებდი და ოთხი წელია განადგურებული ვართ მე და მამაშენი“ – ამის შესახებ გარდაცვლილი პროგრამისტის, თამარ ბაჩალიაშვილის დედა სოციალურ ქსელში წერს და შვილის დაბადების დღესთან დაკავშირებით ემოციურ პოსტს აქვეყნებს.
თეონა თამაზაშვილი გარდაცვლილ შვილს დაბადების დღეს ულოცავს და წერს, რომ თამარი დღეს 27 წლის გახდებოდა. თამარის დედა იმედოვნებს, რომ სამართალი საბოლოოდ იზეიმებს და ბაჩალიაშვილის საქმეს ნათელი მოეფინება:
„თამო ჩემო ტკივილო და სამუდამო სევდავ, დღეს 27 წელი შეგისრულდებოდა მტარვალს რომ არ გამოესალმებინე სიცოცხლეს. 23 წელი გვაბედნიერებდი და ოთხი წელია განადგურებული ვართ მე და მამაშენი.
უფლის სამართალი ურმით დადიდსო და ვცოცხლობთ მოვესწროთ იმ დღეს, როცა უფლის სამართალი მაინც იზეიმებს. იმედია ძალიან არ დააგვიანებს“ – წერს თეონა თამაზაშვილი.
შეგახსენებთ, რომ 23 წლის პროგრამისტი, თამარ ბაჩალიაშვილი 2020 წლის 18 ივლისს გაუჩინარდა. რამდენიმე დღიანი ძებნის შემდეგ, თეთრიწყაროს ტყეში, იგი საკუთარ მანქანაში გარდაცვლილი იპოვეს.
