თავისუფლების და კეთილდღეობის გლობალურ რეიტინგებში, ატლანტიკურმა საბჭომ საქართველო 50 საუკეთესო სახელმწიფოს შორის დაასახელა

„ატლანტიკურმა საბჭომ“ საქართველო თავისუფლებისა და კეთილდღეობის გლობალურ რეიტინგებში 50 საუკეთესო სახელმწიფოს შორის დაასახელა. თავისუფლების ინდექსის მიხედვით, საქართველო ქვეყნებსა და ტერიტორიებს შორის 51-ე, ხოლო სახელმწიფოთა შორის 50-ე ადგილზე გავიდა, სტატუსით „ზომიერად თავისუფალი“. თავისუფლების დონით საქართველო უსწრებს ყველა მეზობელ ქვეყანას და ევროკავშირის კანდიდატ ყველა სახელმწიფოს. თავისუფლების ინდექსის რეიტინგი მსოფლიოს 164 ქვეყანასა და ტერიტორიას ყოფს ოთხ კატეგორიად: მაღალი თავისუფლება; ზომიერი თავისუფლება; თავისუფლების დაბალი დონე და თავისუფლების უდაბლესი დონე.

ორგანიზაცია თავისუფლების მდგომარეობას აფასებს ისეთი კრიტერიუმებით, როგორიცაა: სამართლიანი არჩევნები, სამოქალაქო თავისუფლებები, პოლიტიკური უფლებები, კანონის სიცხადე, სასამართლოს დამოუკიდებლობა და ეფექტიანობა, ჯანსაღი ბიუროკრატია და კორუფციისგან თავისუფლება, საზოგადოებრივი უსაფრთხოება, საკუთრების უფლება და ა.შ. თავისუფლების შეფასების 100-პროცენტიანი სისტემით საქართველომ 73,38 პროცენტი მიიღო. კეთილდღეობის ინდექსში 74,99 პროცენტის და მსოფლიოში 46-ე ადგილზეა. კეთილდღეობის შეფასება ეფუძნება ექვს საყრდენს: შემოსავლების დონე; გარემოს დაცვა; უმცირესობების ინტერესების დაცულობა; საზოგადოებრივი ჯანმრთელობა; განათლება; თანასწორობა. საქართველომ ინდექსის მიხედვით „ზომიერი კეთილდღეობის“ სტატუსი მიიღო.