ივანიშვილს მთავრობის წარმომადგენელი პერსონალურ შიკრიკად ჰყავს გაგზავნილი აშშ-ში - გიორგი გახარია
პარტია "საქართველოსთვის" ლიდერი, გიორგი გახარია ამბობს, რომ "ქართული ოცნების" საპატიო თავმჯდომარე ბიძინა ივანიშვილმა მთავრობის ერთ-ერთი წარმომადგენელი ამერიკაში გააგზავნა "პერსონალურ შიკრიკად".
გახარია სახელსა და გვარს ან სხვა დეტალებს არ აკონკრეტებს, მაგრამ ამბობს, რომ პირი, რომელიც ამერიკაში ივანიშვილის პრობლემების მოსაგვარებლად გაიგზავნა, ძალოვან სტრუქტურას წარმოადგენს. ეს მას შემდეგ მოხდა, რაც ამერიკამ სანქციების დაწესება დააანონსა ხელისუფლების წარმომადგენლების მიმართ.
"ჩვენი ხელისუფლება აქ რომ პოზებში დგას, რომ აი ჩვენ რაღაც, ჩვენი სუვერენიტეტი, სხვისი აზრი არ გვაინტერესებს, გულში მჯიღებს რომ ირტყამენ, სინამდვილეში იმდენად შეშინებულები არიან შიკრიკს შიკრიკზე აგზავნიან იქნებ როგორმე გაიგონ მაინც იქ რა ხდება. ახლაც მორიგი შიკრიკი ჰყავდათ გაგზავნილი, ფოსტალიონი, საკმაოდ მაღალი დონის, ბიძინა ივანიშვილს ჰყავს გაგზავნილი, საქართველოს მთავრობის ერთ-ერთ წარმომადგენელი თავის პერსონალურ შიკრიკად გაგზავნილი ჰყავს იქ. ჯობდა, რომ არ გაეგზავნა. ეს კიდევ ერთი მაგალითია იმის, თუ როგორ არ ესმის დღევანდელ ხელისუფლებას, როგორ ფუნქციონირებს ... დემოკრატია.
ჰგონიათ, რომ პოლიტიკიდან გაწეული ე.წ. საპატიო თავმჯდომარე, ქვეყნის ერთ-ერთ მთავარ პოლიტიკურ, პოლიტიკურ?! ნუ ძალოვან ფიგურას რომ აგზავნის შიკრიკად, თავის ფოსტალიონად უცხო ქვეყანაში, ეს ჰგონია ან სწორად, თავისი უძლეველობის რაღაც წარმომსახველად, ნუ საოცარია", - თქვა გახარიამ.
