"ჩვენი მიზანი იყო, ქართველ ხალხს თავი ამაყად ეგრძნო და ვფიქრობ, ეს მოვახერხეთ“ - გიორგი ქოჩორაშვილი

საქართველოს ეროვნული ნაკრების ფეხბურთელი გიორგი ქოჩორაშვილი ევროპის 2024 წლის ჩემპიონატზე ასპარეზობის დასრულების შემდეგ სოციალურ ქსელში პოსტს აქვეყნებს და ქართველ გულშემატკივარს მხარდაჭერისთვის მადლობას უხდის. 

როგორც გიორგი ქოჩორაშვილი წერს, ერთიანობის შედეგი ის, რომ საქართველომ მერვედფინალში გასვლა შეძლო.

„დაუვიწყარი თავგადასავალი გერმანიაში დასრულებულია. დებიუტანტი გუნდი, რომელმაც გააცნო ყველას თავი საკუთარი იდენტობით. 26 მარტის მატჩის დასრულების შემდეგ, ყველას ერთი მიზანი გვქონდა: ტურნირზე ჩვენი გამოსვლის შემდეგ ქართველ ხალხს თავი ამაყად ეგრძნო და ვფიქრობ, ეს მოვახერხეთ.

ყველა ის წამი, რომელიც შეკრების დაწყების დღიდან ერთად გავატარეთ, მართლაც უნიკალური და დაუვიწყარი იყო. ვფიქრობ, ამ ერთიანობამ მოიტანა ის შედეგი, რომლითაც დღეს შეგვიძლია ბედნიერები ვიყოთ, ხვალინდელი დღის უკეთესი შედეგის იმედად.

ბევრჯერ მითქვამს და არასდროს დავიღლები იმის თქმით, რომ მსოფლიოში საუკეთესო გულშემატკივარი გვყავს, რომელიც არასდროს გვტოვებს მარტო. ევროპის ჩემპიონატის 1/8 ფინალში ესპანეთის წინააღმდეგ, გერმანიაში, თავს საკუთარ მოედანზე ვგრძნობდით. მადლობა ყველას მხარდაჭერისთვის, ტრიბუნიდან, ქუჩის ეკრანებიდან, თუ სახლიდან, ყველა ძალა ჩვენამდე სრული სიზუსტით მოვიდა და ამან ყველა ეტაპზე გაგვაძლიერა. მომავალ შეხვედრამდე“, - წერს გიორგი ქოჩორაშვილი.