Gordon: ზელენსკი უკრაინის პარლამენტს საომარი მდგომარეობის გახანგრძლივებას სთხოვს
უკრაინის პრეზიდენტმა ვოლოდიმირ ზელენსკიმ ქვეყნის უმაღლეს რადაში საყოველთაო მობილიზაციისა და საომარი მდგომარეობის გახანგრძლივების შესახებ კანონპროექტები შეიტანა. ინფორმაციას ამის შესახებ უკრაინული გამოცემა Gordon.ua ავრცელებს.
დღეს მოქმედი კანონმდებლობით, მობილიზაციისა და საომარი მდგომარეობის მოქმედება 11 აგვისტოს იწურება. ზელენსკი პარლამენტს მათ 12 აგვისტოდან 90 დღით, ანუ 9 ნოემბრამდე გახანგრძლივებას ითხოვს.
როგორც უკრაინის პარლამენტის წევრი პარტია „გოლოს“-იდან იაროსლავ ჟელეზნიაკი აღნიშნავს, კანონპროექტები დღესვე საკომიტეტო მოსმენებზე განიხილება, ხოლო შემდეგ მათ პლენარულ სესიაზე კენჭს უყრიან.
უკრაინაში საომარი მდგომარეობა და საყოველთაო მობილიზაცია 2022 წლის 24 თებერვლიდან მოქმედებს. პარლამენტი ამ რეჟიმებს პერიოდულად ახანგრძლივებს.
