„ფოტოებზე რაც ნახეს, გველი ხელში ჰყავდა აყვანილი. ალბათ ვერ იგრძნო, რომ უკბინა“ - ქობულეთის მერიის წარმომადგენელი გველის ნაკბენით გარდაცვლილ ტურისტზე
ქობულეთის მუნიციპალიტეტის სოფელ ჩაისუბანში, გველის ნაკბენით გარდაცვლილი გერმანელი ტურისტი 45 წლამდე ასაკის მამაკაცია.
ქობულეთში გველის ნაკბენით ტურისტი გარდაიცვალა
აღნიშნულ ფაქტზე ქობულეთის მერიის წარმომადგენელმა ჩაისუბანში, ჯუმბერ ყურშუბაძემ „ბათუმელებთან“ ისაუბრა და განაცხადა, რომ ტურისტს გველი ხელში ჰყავდა აყვანილი.
„მთის ასპიტი რქმევია ამ გველს, ყოფილა ჩვენს მთებში. გარემოს დაცვის სამსახურის წარმომადგენლებმა სურათი რომ ნახეს, თქვეს, ეს გველიაო. ტყეში იყო ფაქტობრივად, სასწრაფომ ვერ აუსწრო და გარდაიცვალა.
ფოტოებზე რაც ნახეს, გველი ხელში ჰყავდა აყვანილი. ხელთათმანი კი ეკეთა ტურისტს, მაგრამ როგორც ჩანს, ვერ დაიცვა. ალბათ ვერ იგრძნო, რომ უკბინა. აქამდე არ ყოფილა აქ მსგავსი შემთხვევა. გადამფრენ ფრინველებს აკვირდებიან ამ ადგილზე, მაგრამ გველი რომ ვინმეს ხელში აეყვანოს, ასეთი შემთხვევა არ ყოფილა“- უთხრა „ბათუმელებს“ ჯუმბერ ყურშუბაძემ.
