„უფროსი ბავშვები კიოდნენ, კარი რომ გავაღე, ცეცხლი შემომივარდა...“ – რას ჰყვებიან მეზობლები ზუგდიდში გაჩენილ ხანძარზე, რომელსაც ორი მცირეწლოვანი ემსხვერპლა
შემზარავი ტრაგედია ზუგდიდში - ბინაში გაჩენილი ხანძრის დროს ტყუპი ბავშვები დაიწვნენ. არსებული ინფორმაციით, უბედური შემთხვევის დროს კიდევ ორი მოზარდი გადარჩა. როგორც გადარჩენილი ბავშვები ჰყვებიან, პატარები ვერ გააღვიძეს.
მიუხედავად იმისა, რომ საგანგებო სიტუაციების მართვის სამსახურის რამდენიმე ბრიგადა დროულად მივიდა და ოპერატიულად მოხდა ცეცხლის ჩაქრობა, საშინელი ტრაგედია დატრიალდა.
„ჩემთან შემოვარდა 2 ბავშვი, კარი გამიღეო, კიოდნენ, კარი რომ გავაღე, ცეცხლი შემომივარდა, ორივე შიგნით შემოვიყვანე და კარი მივხურე, ვერ გაგიშვებ, შენც დაიწვები მეთქი, მეუბნებოდა, ბავშვებს გამოვიყვან შიგნიდანო.
მათ არანაირი დამწვრობა არ ჰქონდათ, ცეცხლი რას გაუჩნდა, არ ვიცით...“ – ამბობს მეზობელი.
„ცეცხლი 01:30 საათზე გაჩნდა, სახანძროში დარეკეს, მაგრამ არაფერმა უშველა.
ტყუპები 5 წლისები იყვნენ. გადარჩენილები გოგო და ბიჭი არიან – მეხუთე და მეექვსე კლასელები, მშობლები წასულები არიან სადღაც, დედა მუშაობდა, საცოდავი, თხილზე დადიოდა.
სოციალურ სამსახურს ბავშვები წაყვანილი ჰყავდა, მაგრამ შემდეგ დედამ დაიბრუნა, რადგან შემოსავალი ჰქონდა.
უფროს და-ძმასთან ტოვებდა ხოლმე, გოგო ისეთი ჭკვიანია, ძალიან დიდ ყურადღებას აქცევდა“, – ამბობს ადგილობრივი.
