ვოლსკი ბულგარეთში შეტანილ ჰეროინზე: ვერ დააბრალებთ შსს-ს, რომ არ ებრძვის ნარკოდანაშაულს

საქართველოს გავლით იყო ნარკოტრაფიკი, როგორც გაეროს სპეციალური სააგენტოს მოხსენებებში ვკითხულობთ - 2012 წლამდე რამდენიმე ფაქტი იყო, აღმოჩენებიც საკმაოდ დიდი იყო და ვერ დააბრალებთ ჩვენს შსს-ს და სამართალდამცავ ორგანოებს, რომ ნარკოტიკების წინააღმდეგ არ იბრძვის.

თუ ასეთი რამ მოხდა, ალბათ მისი წარმომავლობაც გაირკვევა და ტრაფიკის გზაც გამოვლინდება - სამწუხაროა, თუკი ასეთი ფაქტი მოხდა, მაგრამ ეს იმას არ ნიშნავს, რომ თქვენ ამით გახარებული იყოთ და პოლიტიკურ ველზე რაღაც უპირატესობა მოიპოვოთ.

[...] შეიძლება არც არის სიმართლე, რაღაც გაიგეთ, სადღაც აღმოაჩინეს, დაიწერა და ნუ, დაწერას რა უნდა.

საქართველოს ძალოვანი სტრუქტურები საკმაოდ წარმატებულად იბრძვიან ნარკოტიკების წინააღმდეგ, არაერთი ქსელია გამოვლენილი, რომელიც თქვენი ბელადების დროს არსებობდა.

ასე გამოეხმაურა ქართული ოცნების დეპუტატი, გიორგი ვოლსკი ბულგარეთში, ბურგასის პორტში, საქართველოს გავლით 436 კილოგრამი ჰეროინის შეტანის ფაქტს.

ბულგარეთის პროკურორის ოფისის ცნობით, ნარკოტიკი ერთ-ერთი გემის დეკლარირებულ ტვირთში ინახებოდა - არსებული ინფორმაციით, ტრაილერი ყირგიზეთიდან საქართველოში შევიდა და შედგომ, ბათუმის პორტიდან ბულგარეთში გადავიდა.