“Levante“ საქართველოში ახალი ტალანტების ძებნას იწყებს

ესპანური საფეხბურთო კლუბი “Levante“ ახალი ტალანტების შესარჩევად საქართველოში ჩამოდის. ინფორმაციას ესპანური კლუბის ნახევარმცველი, გიორგი ქოჩორაშვილი სოციალურ ქსელში ავრცელებს.

ფეხბურთელი მიჩნევს, რომ საწვრთნელი ბანაკი, სადაც 10 საუკეთესო ბავშვი მოხვდება, საუკეთესო საშუალებაა მომავალი ფეხბურთელების ჩამოყალიბებისთვის.

ძალიან ბედნიერი ვარ, რომ მაქვს შესაძლებლობა გაგიზიაროთ ამბავი საქართველოში ლევანტეს საწვრთნელი ბანაკის შესახებ.

19-20 აგვისტოს ლევანტე, საქართველოს ფეხბურთის ფედერაციის მხარდაჭერით დიდი დიღმის საფეხბურთო ცენტრში უმასპინძლებს 2006-2011 წლებში დაბადებულ ახალგაზრდა ფეხბურთელებს.

საწვრთნელი ბანაკის შემდეგ შეირჩევა 10 ფეხბურთელი, რომლებსაც საშუალება ექნებათ მიიღონ მონაწილეობა ლევანტეს პროექტ PLAYER EXPERIENCE-ში და ორი კვირა გაატარონ ლევანტეს აკადემიაში და მიიღონ ის ცხოვრებისეული და სპორტული გამოცდილება, რაც დაეხმარებათ, რომ გახდნენ უკეთესი ადამიანები და პროფესიონალები. პირობების შესახებ დეტალური ინფორმაციას იხილავთ ლევანტეს პოსტში. Levante UD

ჩემთვის ძალიან მნიშვნელოვანია, რომ ახალგაზრდა ქართველ ფეხბურთელებს ექნებათ იმ ყველაფრის ნახვისა და საკუთარ თავზე გამოცდის შანსი, რაც მე დამეხმარა, რომ მივსულიყავი ჩემს მიზნებთან.

დიდი მადლობა ლევანტეს ამ ინიციატივისთვის და საქართველოს ფეხბურთის ფედერაციას მხარდაჭერისთვის.

შეხვედრამდე!“, – წერს ქოჩორაშვილი.

მანამდე, „ლევანტეს“ პრესსამსახურმა განცხადება გაავრცელა, რომ ესპანური კლუბის წარმომადგენლები საქართველოში 2006-2011 წლებში დაბადებულ ტალანტებს შეარჩევენ.