სემეკმა „თელასი“ 5000 ლარით დააჯარიმა

საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ), განმეორებითი დარღვევის გამო, „თელასი“ 5000 ლარით დააჯარიმა.

სემეკის ინფორმაციით, საკითხი ახალი მომხმარებლის ქსელთან მიერთების პროცედურების დარღვევას ეხება. კერძოდ, ირკვევა, რომ „თელასის“ ქსელში ჩართული იყო მიკროსიმძლავრის ელექტროსადგური, რომლის დადგმული სიმძლავრე აჭარბებდა კანონმდებლობით განსაზღვრულ ზედა ზღვარს - 500 კილოვატს, ასევე დარღვეული იყო ქსელზე მიერთების პროცედურები, რის გამოც, თავდაპირველად, მარეგულირებელმა "თელასს" დარღვევის აღმოფხვრა დაავალა, თუმცა კომპანიამ რეაგირება არ მოახდინა, რასაც დაჯარიმება მოჰყვა. შედეგად, კომპანიას კვლავ დაევალა სემეკის მიერ განსაზღვრულ ვადაში დარღვევების აღმოფხვრა და დაკისრებული ჯარიმის - 5000 ლარის გადახდა სახელმწიფო ბიუჯეტში.

"სს „თელასმა“ მომართა სემეკს და მოითხოვა გამანაწილებელ ქსელთან ახალი მომხმარებლის მიერთების საფასურის გადახედვა. კომპანიის მიერ მიერთებისთვის გასაწევი ხარჯების ადეკვატურობის შეფასების მიზნით, სემეკმა დაიწყო სს „თელასის“ გამანაწილებელ ქსელთან ახალი მომხმარებლების მიერთების და უკვე მიერთებული მომხმარებლების სიმძლავრის გაზრდის პროექტების შესწავლა. მოკვლევის შედეგად დადგინდა, რომ სს „თელასის“ ქსელში ჩართული იყო მიკროსიმძლავრის ელექტროსადგური, რომლის დადგმული სიმძლავრე აღემატებოდა კანონმდებლობით განსაზღვრულ ზედა ზღვარს - 500 კილოვატს, ასევე დარღვეული იყო ქსელზე მიერთების პროცედურები. აღნიშნული დარღვევის გამოსწორების მიზნით კომპანიას მიეცა მითითება, თუმცა განმეორებითი შემოწმებისას გამოვლინდა, რომ დარღვევა არ იყო გამოსწორებული, ამასთანავე სემეკის მიერ დადგენილი რეგულაციები დარღვეული იყო სხვა მიერთების შემთხვევაშიც.

განახლებადი ენერგიების განვითარების ხელშეწყობის მიზნით სემეკის მიერ დანერგილი რეგულაციების შესაბამისად, მომხმარებელს ან მომხმარებელთა ჯგუფს შეუძლია ფლობდეს მიკროსიმძლავრის ელექტროსადგურს და მისი საშუალებით ელექტროენერგია გამოიმუშაოს განახლებადი ენერგიების (მზე, ქარი, წყალი) გამოყენებით, ხოლო ჭარბად გამომუშავებული ენერგია მიაწოდოს გამანაწილებელი ქსელს.

კანონმდებლობის შესაბამისად, მიკროსიმძლავრის ელექტროსადგურის დადგმული სიმძლავრე არ უნდა აღემატებოდეს 500 კილოვატს. ელექტროსადგურის მფლობელი/ საბოლოო მომხმარებელი ან საბოლოო მომხმარებელთა ჯგუფი უფლებამოსილია მიკროსიმძლავრის ელექტროსადგური მიაერთოს გამანაწილებელ ქსელთან და წარმოებული ჭარბი ელექტროენერგია მოიხმაროს ან მიაწოდოს იმავე გამანაწილებელ ქსელში ჩართულ ობიექტს. დაუშვებელია მიკროსიმძლავრის ელექტროსადგურის მიერ გამომუშავებული ენერგიის მოხმარება სემეკის მოთხოვნების დარღვევით.

სემეკი მოუწოდებს გამანაწილებელ კომპანიებსა და მიკროსიმძლავრის ელექტროსადგურების მფლობელებს/მომხმარებლებს სრულად დაიცვან კანონმდებლობით განსაზღვრული ნორმები",- აღნიშნულია სემეკის განცხადებაში.