“მე-2 იარუსი 41 000-მდე იტევს” - დინამო დამატებით განმარტებას აკეთებს

დინამოს ადმინისტრაცია დამატებით განმარტებას აკეთებს და აღნიშნავს, რომ მეორე იარუსი, რომელიც ფედერაციას შესთავაზეს, 41 ათასამდე მაყურებელს იტევს, რაც მიხეილ მესხის მთლიანი სტადიონის ტევადობას მნიშვნელოვნად აღემატება. მესხის სტადიონი 27 223 ადამიანს იტევს.

ეს განცხადება დინამომ ფეხბურთის ფედერაციის პრეზიდენტის, ლევან კობიაშვილის კომენტარის შემდეგ, გაავრცელა, რომელმაც თქვა, რომ "მხოლოდ მეორე იარუსის გამოყენება არასერიოზულია".

"მაღალი საზოგადოებრივი ინტერესიდან გამომდინარე გვსურს დინამო არენას მდგომარეობის შესახებ დამატებითი განმარტება გავაკეთოთ.

დინამო არენას ადმინისტრაციამ საქართველოს ფეხბურთის ფედერაციას ორი წერილი გაუგზავნა, პირველი ეხებოდა ჩვენს მზადყოფნას, რომ სტადიონს კვლავ შეუძლია ეროვნული ნაკრების მასპინძლობა. მეორეში კი მოხდა დაზუსტება - იქიდან გამომდინარე, რომ დინამო არენას ბოლო უსაფრთხოების სერტიფიკატი არ მოიცავდა პირველი იარუსის მე-6, მე-7 და მე-8 სექტორებს, ფეხბურთის ფედერაციას ალტერნატივად შევთავაზეთ, გულშემატკივრის დაშვება მხოლოდ მეორე იარუსზე, რომელიც 41 000-მდე მაყურებელს იტევს.

შეგახსენებთ, რომ დინამო არენას ბოლო გენერალური რესტავრაცია 2015 წელს განხორციელდა და იგი სახელმწიფო ბიუჯეტიდან დაფინანსდა. რესტავრაციის ფარგლებში სრულად აღმოიფხვრა ყველა არსებული პრობლემა და შეგვიძლია მკაფიოდ განვაცხადოთ, რომ მას შემდეგ სტადიონის მდგრადობა არ შეცვლილა. ამას ადასტურებს ყველა საექსპერტო დასკვნა, რომელიც 2015 წლიდან დღემდე მომზადებულა", - წერია განცხადებაში.