13 სექტემბერს პრეზიდენტი ოლიმპიელებსა და პარაოლიმპიელებს დააჯილდოვებს
13 სექტემბერს, საღამოს 7 საათზე, ათონელის ქუჩაზე, ორბელიანების სასახლის წინ საქართველოს პრეზიდენტი, სალომე ზურაბიშვილი ოლიმპიელებსა და პარაოლიმპიელებს ჯილდოებს გადასცემს - ამის შესახებ განცხადება პრეზიდენტის ადმინისტრაციის ლოგისტიკისა და ღონისძიებების ორგანიზების სამსახურის ხელმძღვანელმა, ვლადიმერ ონოფრიშვილმა გააკეთა.
ონოფრიშვილის თქმით, 13 სექტემბრის საღამოს, ოლიმპიელების და პარაოლიმპიელებისთვის ჯილდოს გადაცემასთან დაკავშირებით ორბელიანების სასახლის წინ პრეზიდენტის ადმინისტრაცია ღონისძიებას გამართავს.
"13 სექტემბერს, საღამოს 7 საათზე, საქართველოს პრეზიდენტის ინიციატივით ათონელის ქუჩის მიმდებარედ, კერძოდ ორბელიანი სასახლის წინ გაიმართება სახალხო ზეიმი, სადაც საქართველოს პრეზიდენტი ოლიმპიელებს და პარაოლიმპიელებს ჯილდოებს გადასცემს.
ჩვენ ვიმედოვნებთ და ვეპატიჟებით ყველას და იმედი გვაქვს, რომ მოვა ბევრი ხალხი, სადაც მოსულ საზოგადოებას ექნება საშუალება, რომ მიულოცოს ოლიმპიელებს გამარჯვება, იზეიმოს მათთან ერთად, გადაიღოს ფოტოები და ნახონ მათი კუმირები.
ღონისძიებას ექნება მუსიკალური ნაწილიც, დაჯილდოების შემდეგ იქნება ლელა წურწუმიას და ჩვენი ბენდის კონცერტი და ამით დასრულდება ეს ღონისძიება". - თქვა ონოფრიშვილმა.
