თუ "მოთმინება ამოიწურება“, რუსეთი ბირთვულ იარაღს გამოიყენებს - მედვედევი
რუსეთის უშიშროების საბჭოს მოადგილე დმიტრი მედვედევი აცხადებს, რომ რუსეთი არ იყენებს ბირთვულ იარაღს მტრის თავდასხმების საპასუხოდ, რადგან მას ესმის ასეთი კონფლიქტის საფრთხე, მაგრამ თუ „მოთმინება ამოიწურება“, რუსეთი ბირთვულ იარაღს გამოიყენებს.
რუსეთის უშიშროების საბჭოს თავმჯდომარის მოადგილემ აღნიშნა, რომ ბირთვული კონფლიქტი მართლაც არავის სჭირდება.
„რას ფიქრობენ დასავლელი უფროსები და მათი ომში გართული პოლიტიკური ისტებლიშმენტი ჩვენი ქვეყნის რეაქციაზე „ტერიტორიის სიღრმეში“ შესაძლო სარაკეტო დარტყმებზე? აი, რას: რუსები ბევრს საუბრობენ მასობრივი განადგურების იარაღით პასუხის შესახებ, მაგრამ არაფერს აკეთებენ. ეს მხოლოდ „სიტყვიერი ინტერვენციებია“. რუსები ზღვარს არ გადაკვეთენ. ისინი უბრალოდ გვაშინებენ. ბირთვული კონფლიქტი მათთვის არაფრის მომცემია, მათ შეიძლება უფრო მეტი დაკარგონ, მათ შორის, გლობალური სამხრეთის მხარდაჭერა. და საერთოდ, ვის სჭირდება აპოკალიფსი? და ა.შ.
„სწორედ ამიტომ ჯერჯერობით არ მიღებულა გადაწყვეტილება ბირთვული იარაღის გამოყენების შესახებ (არასტრატეგიული ან, მით უმეტეს, სტრატეგიული). რუსეთი მოთმინებას იჩენს, რადგან, ცხადია, ბირთვული პასუხი უკიდურესად რთული გადაწყვეტილებაა შეუქცევადი შედეგებით. თუმცა გაბღენძილ ანგლო-საქს კაცუნებს არ სურთ ერთი რამის აღიარება: ნებისმიერ მოთმინებას აქვს დასასრული“, - აცხადებს მედვედევი.
