ვინ არის კაცი, რომელიც დონალდ ტრამპის მკვლელობის მცდელობაშია ეჭვმიტანილი?

58 წლის რაიან უესლი რუთი, რომელიც 15 სექტემბერს ფლორიდაში აშშ-ის ექსპრეზიდენტ დონალდ ტრამპის მკვლელობის მცდელობასთან დაკავშირებით დააკავეს, ჰავაიში დასაქმებული მშენებელია. მან რუსეთის სრულმასშტაბიანი შეჭრის შემდეგ უკრაინის მიმართ სოციალურ ქსელში მხარდაჭერა არაერთხელ გამოხატა და ქვეყანას 2022 წელს სტუმრობდა. 

CNN-ის მიერ მოპოვებულ მასალებზე დაყრდნობით, რუთი 2022 წლის 1 მაისს კიევის დამოუკიდებლობის მოედანზე უკრაინელი ჯარისკაცების მხარდასაჭერად გამართულ აქციას დაესწრო და იგივე ადგილს 6 კვირის შემდეგაც ეწვია, რასაც უკრაინის დროშის გვერდით გადაღებული ფოტო მოწმობს.  

ამასთან, CNN-ის ცნობითვე, რუთმა 2022 წელს სოციალურ ქსელში გამოქვეყნებული ათობით პოსტით უკრაინის მიმართ ძლიერი მხარდაჭერა გამოხატა. ის წერდა, რომ ბრძოლაში სიკვდილისთვის მზად იყო და რომ „ჩვენ უნდა დავწვათ კრემლი ბოლომდე“.

„მზად ვარ, წავიდე ხარკოვში, უკრაინის საზღვარზე, რათა იქ მოხალისედ ვიბრძოლო და მოვკვდე… შემიძლია, ვიყო მაგალითი. ჩვენ უნდა გავიმარჯვოთ”, - დაწერა რუთმა X-ზე 2022 წლის მარტში.

ამასთან, მან გასულ წელს Facebook-ით უცხოელებს მოუწოდა, ომში უკრაინის მხარეს ებრძოლათ, საკუთარ თავს უკრაინის ხელისუფლების „არაოფიციალური მეკავშირე“ უწოდა და ავღანელი ჯარისკაცები წაახალისა, რათა უკრაინისთვის ებრძოლათ.

ამასთან, რუთმა მიმდინარე წლის ივლისში პენსილვანიაში წინასაარჩევნო შეხვედრის დროს დონალდ ტრამპის წინააღმდეგ განხორციელებული თავდასხმის შემდეგ სოციალურ ქსელში პოსტი გამოაქვეყნა. მან პრეზიდენტ ჯო ბაიდენსა და ვიცე-პრეზიდენტ კამალა ჰარისს მოუწოდა, ინციდენტის შედეგად დაშავებული ადამიანები მოენახულებინათ. 

„თქვენ და ჯო ბაიდენმა ტრამპის ყრილობაზე დაჭრილი ადამიანები უნდა მოინახულოთ და დაესწროთ მოკლული მეხანძრის დაკრძალვას. ტრამპი მათთვის არასდროს არაფერს გააკეთებს“, - წერდა ის ჰარისის მისამართით გამოქვეყნებულ პოსტში.

ცნობისთვის, დონალდ ტრამპის საარჩევნო შტაბმა გაავრცელა ინფორმაცია, რომ 15 სექტემბერს ფლორიდაში, ტრამპის გოლფკლუბში ექსპრეზიდენტის სიახლოვეს სროლა იყო. 

„ნუ გეშინიათ! მე უსაფრთხოდ ვარ და თავს კარგად ვგრძნობ“, - განაცხადა ინციდენტის შემდეგ დონალდ ტრამპმა.

მომხდარს აშშ-ის პრეზიდენტი ჯო ბაიდენიც გამოეხმაურა. მან ინციდენტი დაგმო და განაცხადა, რომ მშვიდადაა მას შემდეგ, რაც გაიგო, რომ ტრამპი უვნებელია.