ეს არის ურბანული გენოციდის გაგრძელება - ოპოზიცია იპოდრომთან ცათამბჯენების მშენებლობას აპროტესტებს

კოალიცია „ძლიერი საქართველოს“ ერთ-ერთი ლიდერის, საბა ბუაძის განცხადებით, ყოფილი იპოდრომის ტერიტორიაზე 77-სართულიანი 6 ცათამბჯენი აშენებას იგეგმება, რაც დაუშვებელია.

როგორც ბუაძემ ჟურნალისტებთან აღნიშნა, ეს არა მხოლოდ ეკოლოგიურად იქნება კატასტროფის ტოლფასი, არამედ სატრანსპორტო თვალსაზრისითაც ტერიტორიის პარალიზებას მოახდენს.

„ივანიშვილი, კალაძე და მასთან დაკავშირებული ბიზნეს ჯგუფი „ ვისოლი“, ფხაკაძეები და სხვები გეგმავენ, რომ ქალაქის ერთ-ერთი უკანასკნელი მწვანე სივრცე გაანადგურონ, ეს არის ყოფილი იპოდრომის ტერიტორია, რომელიც განადგურების რისკის წინაშე დგას. ეს არის ურბანული გენოციდის გაგრძელება, რომელიც თბილისში დიდი ხანია მიმდინარეობს და რომლის შემდეგაც აქ დაგეგმილია ქალაქში ერთ-ერთი უკანასკნელი და უმნიშვნელოვანესი მწვანე სივრცის განადგურება. აქ დაგეგმილია 77-სართულიანი 6 ცათამბჯენი აშენება და იმ ტყის განადგურება, რომელიც მოსახლეობისთვის, მთელი ქალაქისთვის ერთ-ერთი უკანასკნელი მწვანე თავშესაფარია. ჩვენ მოსახლეობასთან ერთად ამ ტერიტორიის გადასარჩენად ვიბრძვით. საკრებულოს ეს გადაწყვეტილება გავასაჩივრეთ. 27 სექტემბერს, 13:00 საათზე, დაგეგმილი არის ამ სარჩელის განხილვა თბილისის საქალაქო სასამართლოში“,- განაცხადა ბუაძემ.

მისივე თქმით, ტერიტორიის გადასარჩენად უკომპრომისო ბრძოლა გაგრძელდება.

„როგორც ჩანს, „ქართულ ოცნებას“ განზრახული აქვს, არჩევნებისთვის მაქსიმალურად სწრაფად მიიღოს ეს გადაწყვეტილება იმისთვის, რომ ტყე განადგურდეს, გაიჩეხოს და აქ აშენდეს 6 ცათამბჯენი. ეს არა მხოლოდ ეკოლოგიურად იქნება კატასტროფის ტოლფასი, არამედ სატრანსპორტო თვალსაზრისითაც ამ უმნიშვნელოვანესი ტერიტორიის პარალიზებას მოახდენს“, - განაცხადა ბუაძემ.