ემიგრანტების ხმების დაცვას სასამართლოს გზით ვეცდებით - თამარ კორძაია

გახსენით უცხოეთში საარჩევნო უბნები! - ეს განცხადება ცოტა ხნის წინ თამარ კორძაიამ გააკეთა. პლატფორმა "ერთიანობის" ლიდერი  თბილისის საქალაქო სასამართლოს გზით მოითხოვს, დაიცვას სახელმწიფომ საზღვარგარეთ გადახვეწილი მოქალაქეების უფლებები. ოპოზიციონერი ლიდერი იმედოვნებს, რომ ცესკოსგან განსხვავებით, სასამართლო მაინც იქნება გაბედული და შეძლებს, ემიგრანტების ხმები დაიცვას. 

ჩვენ დღეს სასამართლოს მეშვეობით ვეცდებით ემიგრანტების ხმის დაცვას. მე იმედი მაქვს, რომ სასამართლო მაინც იქნება გაბედული და კონკრეტული მოსამართლეები მაინც აიღებენ საკუთარ თავზე პასუხისმგებლობას და დაიცავენ ჩვენი ემიგრანტების უფლებას, რომ მიიღონ არჩევნებში მონაწილეობა და გააკეთონ თავიანთი პოლიტიკური არჩევანი. სამწუხაროდ, ცენტრალური საარჩევნო კომისია, რომელიც ვალდებულია უზრუნველყოს თითოეული მოქალაქისთვის ხმის მიცემის პირობები, ამ მოთხოვნებს არ აკმაყოფილებს და ჩვენს დასაბუთებულ არგუმენტებზე, მოქალაქეების მიერ წარდგენილ განცხადებებზე ამბობს, რომ ეს მისი საქმე არ არის. თქვენ წარმოიდგინეთ, ცესკო ამბობს იმას, რომ საქართველოს მოქალაქეების სურვილი, რომ სურთ ხმის მიცემა და ამ განცხადებების განხილვა, რომელიც დაიწერა ჩვენი მოქალაქეების მიერ, 50-ზე მეტ მსოფლიოს სხვადასხვა ქალაქიდან, თურმე მათი კომპეტენცია არ არის და მისი ფუნქციონირება მაშინ რისთვის არის კანონით განსაზღვრული ამაზე მათ პასუხი არ აქვთ. ამბობენ, რომ საგარეო საქმეთა სამინისტროს მიერ მოწოდებული სიების ფარგლებში მოქმედებენ მხოლოდ, მაგრამ ისინი ამ დროს იტყუებიან. ჩვენ ვეცდებით დღეს სასამართლოზე წარვადგინოთ ეს არგუმენტები. ჩვენ ვიცით, რომ ჩვენ ვართ მართლები კანონის და სამართლის წინაშე, მაგრამ ვნახოთ რა გადაწყვეტილებას მიიღებს სასამართლო, - განაცხადა თამარ კორძაიამ.