"2008 წლის შეთანხმება არ გადაიხედება" – ლავროვი ოკუპირებული ცხინვალის ე.წ. მინისტრს

რუსეთის საგარეო საქმეთა მინისტრი სერგეი ლავროვი ოკუპირებული ცხინვალის ე.წ. საგარეო საქმეთა მინისტრს, აჰსარ ჯიოევს შეხვდა. 

"ვაგრძელებთ ჩვენი მეგობრების დახმარებას ორმხრივი შეთანხმების საფუძველზე უსაფრთხოების მიღწევის, სახელმწიფოს გამყარების, ეკონომიკურ-სოციალური სფეროს განვითარების მიმართულებით. ჩვენი გზა მხოლოდ წინ მიმავალია – 2008 წლის გადაწყვეტილებები განხილვას არ ექვემდებარება". – თქვა ლავროვმა შეხვედრაზე.

ლავროვმა მარიონეტული რეჟიმის წარმომადგენელს "სპეციალური სამხედრო ოპერაციის საკითხზე პრინციპული პოზიციისთვის" მადლობა გადაუხადა. 

რუსეთის საგარეო საქმეთა მინისტრმა შეხვედრაზე ასევე ახსენა ოკუპირებული აფხაზეთიც:

"მჭიდროდ ვთანამშრომლობთ ჩვენს აფხაზ მეგობრებთან კონსულტაციების ფარგლებში, რომლებიც ჟენევაში ტარდებოდა".

დღეს ლავროვი ოკუპირებული აფხაზეთის მარიონეტული რეჟიმის ე.წ. საგარეო საქმეთა მინისტრს, სერგეი შამბას შეხვდება.