არასდროს გვითქვამს, რომ ბირთვული იარაღის შექმნას ვგეგმავთ. ჩვენ დავთმეთ ბირთვული იარაღი პარტნიორები ვალდებულნი იყვნენ, უსაფრთხოების გარანტიები მოეცათ ჩვენთვის - ზელენსკი
უკრაინის პრეზიდენტმა, ვოლოდიმირ ზელენსკიმ უარყო ინფორმაცია უკრაინის მიერ ბირთვული იარაღის შექმნის გეგმებთან დაკავშირებით. აღნიშნული განცხადება ზელენსკიმ ბრიუსელში ნატო-ს გენერალურ მდივანთან, მარკ რუტესთან ერთად გამართულ პრესკონფერენციაზე გააკეთა.
„ჩვენ არასდროს გვითქვამს, რომ ბირთვული იარაღის შექმნას ვგეგმავთ. მე ვთქვი, რომ ბუდაპეშტის მემორანდუმი როდესაც გაფორმდა, აღნიშნული იყო, რომ უკრაინა უარს იტყოდა ბირთვულ იარაღზე და უკრაინა ხელმომწერი ქვეყნებისგან მიიღებდა უსაფრთხოების, ტერიტორიული მთლიანობისა და სუვერენიტეტის გარანტიებს. ეს ნიშნავს, რომ ჩვენ დავთმეთ ბირთვული იარაღი და ეს ადამიანები, რომლებიც მაშინ პარტნიორები იყვნენ, ვალდებულნი იყვნენ, უსაფრთხოების გარანტიები მოეცათ ჩვენთვის“, – აღნიშნა ვოლოდიმირ ზელენსკიმ.
უკრაინის პრეზიდენტის განცხადებით, ბუდაპეშტის მემორანდუმმა ვერ დაიცვა უკრაინა რუსეთის სამხედრო აგრესიისგან, სწორედ ამიტომ იგი იმედებს ამყარებს ნატო-ზე.
თავის მხრივ, ნატოს გენერალურმა მდივანმა, მარკ რუტემ აღნიშნა, რომ მედიამ არ უნდა დაამახინჯოს ფაქტები. რუტეს თქმით, უკრაინა უნდა იყოს ნატო-ში და პარტნიორები გააკეთებენ ყველაფერს, რაც გამარჯვებისთვისაა საჭირო.
ცნობისთვის, გერმანულმა გამოცემა „ბილდმა“ უკრაინელ მაღალჩინოსნებზე დაყრდნობით დაწერა, რომ უკრაინას აქვს მასალა და ცოდნა ბირთვული იარაღის შესაქმნელად: „მასალა გვაქვს, ცოდნაც. მითითება თუ იქნება, პირველი ბომბის შესაქმნელად მხოლოდ რამდენიმე კვირა დაგვჭირდება“.
1tv.ge
