ჩრდილოეთ კორეელი სამხედროების მცირე რაოდენობა უკვე უკრაინის ტერიტორიაზე იმყოფება - სიენენი
ჩრდილოეთ კორეელი სამხედროები უკვე უკრაინის ტერიტორიაზე იმყოფებიან, – ამის შესახებ „სიენენი“ წერს.
კერძოდ, „სიენენი“ ორ ანონიმურ წყაროზე დაყრდნობით იუწყება, რომ დასავლური დაზვერვის ინფორმაციით, უკრაინის ტერიტორიაზე იმყოფება ჩრდილოეთ კორეელი სამხედროების მცირე რაოდენობა, რომლებიც მანამდე რუსეთში მომზადებისთვის ჩავიდნენ.
„როგორც ჩანს, მათი გარკვეული რაოდენობა უკვე მოქმედებაზეა გადასული“, – აღნიშნავს ერთ-ერთი წყარო.
„სიენენის“ წყაროების ცნობით, რუსეთში გაგზავნილი ჩრდილოეთ კორეელი სამხედროების უმეტესობა სპეცდანიშნულების ძალებს წარმოადგენს და მათი საბრძოლო ეფექტურობის შეფასება ამ ეტაპზე რთულია. ისინი ვარაუდობენ, რომ ჩრდილოეთ კორეელი ჯარისკაცების ნაწილი საბრძოლო მოქმედებების ზონაში მოხვედრისთანავე დეზერტირად იქცევა, ხოლო ენობრივი ბარიერი მნიშვნელოვანი დაბრკოლება იქნება ოპერაციების განხორციელებისას.
ერთ-ერთმა დასავლელმა მაღალჩინოსანმა „სიენენს“ განუცხადა, რომ უკრაინის წინააღმდეგ რუსეთის ომში ჩართული ჩრდილოეთ კორეელი სამხედროების რაოდენობა შესაძლოა, კიდევ გაიზარდოს.
„მოკავშირეები და პარტნიორები მთელ მსოფლიოში აკვირდებიან, მართავენ კონსულტაციებს და აქტიურად ცვლიან სადაზვერვო ინფორმაციას ამ საკითხზე, რადგან ეს გავლენას ახდენს ევროატლანტიკური, ინდო-წყნარი ოკეანის რეგიონების უსაფრთხოებაზე და არა მხოლოდ“, – ამბობს „სიენენთან“ საუბრისას წყარო.
