ბრიტანეთმა უკრაინისთვის რაკეტების მიწოდება შეწყვიტა, კიევსა და ლონდონს შორის ურთიერთობა გაუარესდა - The Guardian

უკრაინასა და დიდ ბრიტანეთს შორის ურთიერთობა შესამჩნევად გაცივდა მას შემდეგ, რაც მიმდინარე წლის ივლისში ლონდონში მთავრობა შეიცვალა. ამის შესახებ ბრიტანული გამოცემა The Guardian-ი წერს.

გამოცემასთან საუბარში უკრაინის ოფიციალურმა პირებმა გამოხატეს იმედგაცრუება იმის გამო, რომ დიდმა ბრიტანეთმა კიევს დამატებითი Storm Shadow-ის რაკეტები არ მიაწოდა მას შემდეგ, რაც ქვეყანაში მთავრობა შეიცვალა. გარდა ამისა, ბრიტანეთის ახალი პრემიერ-მინისტრი კირ სტარმერი ჯერ კიდევ არ ჩასულა უკრაინაში. კიევი კი ასეთი ვიზიტის აზრს ვერ ხედავს, თუ ლონდონი რაკეტების ახალი პარტიის მიწოდებას არ გადაწყვეტს.

როგორც გამოცემა აღნიშნავს, უკრაინის მთავარი პრეტენზია დიდ ბრიტანეთთან არის ის, რომ მას არ მიუწოდებია დამატებითი რაკეტები Storm Shadow მარაგიდან, თუნდაც 2014 წლიდან რუსეთის მიერ ოკუპირებულ ყირიმსა და უკრაინის სხვა ტერიტორიებზე არსებული სამიზნეების წინააღმდეგ გამოსაყენებლად.

„ეს არ ხდება. სტარმერი არ გვაძლევს შორი მოქმედების იარაღს. სიტუაცია არ არის ისეთი, როგორიც რიში სუნაკის პრემიერ-მინისტრობის დროს იყო. ურთიერთობები გაუარესდა“, - განუცხადა გამოცემას უკრაინელმა მაღალჩინოსანმა ზელენსკის ოფისიდან.

The Guardian აღნიშნავს, რომ სუნაკი კიევს 2022 წლის ნოემბერში ეწვია - თანამდებობის დაკავებიდან ერთი თვის განმავლობაში. ბორის ჯონსონი კი რამდენჯერმე იყო კიევში.

გამოცემა ასევე ირწმუნება, რომ უკრაინელმა სამხედროებმა Storm Shadow-ის რაკეტებით ბოლო თავდასხმა 5 ოქტომბერს რუსეთის სამეთაურო პუნქტებზე განახორციელეს.

7 ნოემბერს ვოლოდიმირ ზელენსკი და კირ სტარმერი ერთმანეთს ბუდაპეშტში, ევროპის სამიტზე შეხვდნენ, მაგრამ შეხვედრა უშედეგოდ დასრულდა, აცხადებენ უკრაინული წყაროები ბრიტანელ ჟურნალისტებთან.

„აგვისტოდან ვმსჯელობთ სტარმერის შესაძლო ვიზიტზე. იყო საუბარი სხვადასხვა თარიღზე. სტარმერმა ვიზიტი რამდენჯერმე გადადო. მის ტურისტად ჩასვლას აზრი არ აქვს. ამ დროისთვის მას არ სურს საჭირო გადაწყვეტილებების მიღება“, - განუცხადა გამოცემას წყარომ.

დიდი ბრიტანეთის პრემიერ-მინისტრის მიმართ კიევის უკმაყოფილება ასევე მოიცავს უკრაინის შეიარაღებული ძალების მიერ რუსეთის ტერიტორიის სამიზნეებზე დარტყმებისთვის ბრიტანული რაკეტების გამოყენების აკრძალვას. გარდა ამისა, ლონდონი არ იყო ენთუზიაზმით განწყობილი „გამარჯვების გეგმით“, რომელიც ზელენსკიმ ყველა ძირითად პარტნიორს ამ შემოდგომას წარუდგინა.

The Guardian-ის ცნობით, კიევში მიაჩნიათ, რომ სტარმერს უბრალოდ არ სურს სტრატეგიული გადაწყვეტილებების მიღება ვაშინგტონის თანხმობის გარეშე, თუმცა ბრიტანეთს აქვს დამოუკიდებლად მოქმედების თავისუფლება.