„უკრაინა ჩემი ცხოვრების მნიშვნელოვანი ნაწილია, ჩემი მეგობრებია, ჩემი პატარა ქალიშვილია, უკრაინელი ჟასმინი…“ – რას წერს „ტელეგრაფი“ სააკაშვილის პირად ცხოვრებაზე?
„საქართველოს ყოფილი პრეზიდენტისა და უკრაინელი პოლიტიკოსის მიხეილ სააკაშვილის პირადი ცხოვრება ხშირად იწვევდა მზარდ ინტერესს. ირკვევა, რომ დაპატიმრებულ პოლიტიკოსს ოთხი შვილი ჰყავს“, – ამ შინაარსის სტატიას უკრაინული მედია „ტელეგრაფი“ ექსპრეზიდენტ მიხეილ სააკაშვილის შესახებ აქვეყნებს.
„ტელეგრაფმა“ გადაწყვიტა გაერკვია, როგორ გამოიყურებიან მიხეილ სააკაშვილის მემკვიდრეები და რა არის ცნობილი მათ შესახებ ამჟამად. გამოცემამ რამდენიმე ფაქტი გაარკვია.
„ორი ვაჟი პირველი ცოლისგან და ორი უკანონო ქალიშვილი: როგორ გამოიყურებიან მიხეილ სააკაშვილის შვილები?“ – წერს ამ სათაურით უკრაინული „ტელეგრაფი“ და სააკაშვილის პირადი ცხოვრების დეტალებზე ინფორმაციას ავრცელებს.
რა არის ცნობილი მიხეილ სააკაშვილის პირადი ცხოვრების შესახებ
1993 წელს ქართველი და უკრაინელი პოლიტიკოსი მიხეილ სააკაშვილი სტრასბურგში სწავლისას, ჰოლანდიელ სანდრა რულოვსს შეხვდა. წყვილმა რომანტიკული ურთიერთობა დაიწყო, რომელიც ქორწინებით დასრულდა.
სააკაშვილის მეუღლე წითელი ჯვრის თანამშრომელი იყო და ქუთაისს ჰუმანიტარული ჯგუფის ფარგლებში სტუმრობდა. საქართველოს ექსპრეზიდენტისთვის ის ნამდვილი მხარდამჭერი და კარგი მრჩეველი გახდა, რადგან ის საარჩევნო კამპანიის დროს ეხმარებოდა.
სანდრამ ასევე დააარსა Soho Foundation, არასამთავრობო საქველმოქმედო ორგანიზაცია, რომელიც ბავშვებს, დევნილებს, მარტოხელა პენსიონერებს და მრავალშვილიან ოჯახებს ეხმარება.
როგორ გამოიყურებიან მიხეილ სააკაშვილის შვილები
სანდრასთან ქორწინებაში სააკაშვილს ორი ვაჟი შეეძინა: ედუარდი (დაიბადა 1995 წელს) და ნიკოლოზი (2005 წელს დაბადებული). რამდენიმე თვის წინ, სანდრა რულოვსმა „ფეისბუქზე“ ფოტო გამოაქვეყნა, რომელშიც ჩანს, როგორ გაიზარდნენ სააკაშვილის შვილები.
ნიკოლოზმა სკოლა თბილისში, წელს დაამთავრა. სხვათა შორის, მისი ნათლია, უკრაინის ექსპრეზიდენტი ვიქტორ იუშჩენკოა.
უფროსმა ვაჟმა ედუარდმა ნიდერლანდების უტრეხტის უნივერსიტეტში ხელოვნური ინტელექტის მიმართულებით მაგისტრის ხარისხი მიიღო. გასულ წელს ედუარდმა ინტერვიუში განაცხადა, რომ მას მამის ჯანმრთელობის მდგომარეობა აწუხებდა, მან ასევე ისაუბრა მიხეილ სააკაშვილის წინააღმდეგ წაყენებულ ბრალდებებზე.
2021 წლის ოქტომბერში ცნობილი გახდა, რომ ქართველი პოლიტიკოსი რომანტიკულ ურთიერთობაში იყო უკრაინელ დეპუტატ ელიზავეტა იასკოსთან. მაშინ, მისმა [მიხეილ სააკაშვილის] ოფიციალურმა მეუღლემ სანდრა რულოსვმა განაცხადა, რომ ქმრის უკრაინელ ქალთან რომანის შესახებ, არაფერი იცოდა. თუმცა, მედიაში ინფორმაცია იმის შესახებ, რომ წყვილი განქორწინდა, არ გავრცელებულა.
გასულ წელს, მიხეილ სააკაშვილმა წერილი მისწერა „უკრაინსკაია პრავდას“ მთავარ რედაქტორს სევგილ მუსაევას, სადაც უკრაინისადმი მის დამოკიდებულებაზე საუბრობდა. პატიმარმა პოლიტიკოსმა განაცხადა, რომ უკრაინა მისი ცხოვრებისა და ბრძოლის ნაწილია. სააკაშვილის თქმით, მას უკრაინაში ჰყავს პატარა ქალიშვილი ჟასმინი, რომლის ნახვისა და მოფერების საშუალება ჯერ არ ჰქონია.
სავარაუდოდ, ელიზავეტა იასკოს შეეძინა ქალიშვილი, რომელმაც 2023 წლის ივნისში განაცხადა, რომ დედა გახდა. გოგონას [ჟასმინის] ფოტოები საჯაროდ არ არსებობს.
„…რა არის ჩემთვის უკრაინა? ეს ჩემი ცხოვრებისა და ბრძოლის მნიშვნელოვანი ნაწილია. ჩემი ზრდასრული ცხოვრების უმეტესი ნაწილი უკრაინაში გავატარე. ახლა უკრაინულად უფრო კარგად ვლაპარაკობ, ვიდრე რუსულად.
უკრაინა ჩემი სახლია კიევში, პატარა მიწის ნაკვეთი მირგოროდში. უკრაინაში ჩემი განსაკუთრებული სიყვარულია ქალაქი ოდესა. უკრაინა ჩემი მეგობრებია, ახლა უკრაინა ჩემი პატარა ქალიშვილია, უკრაინელი ჟასმინი, რომლის ნახვისა და მოფერების საშუალება ჯერ არ მქონია“. – წერდა სააკაშვილი „უკრაინსკაია პრავდას“ მთავარ რედაქტორს.
ასევე 1 წლის წინ [იგულისხმება სააკაშვილის დაპატიმრებიდან], ცნობილი გახდა, რომ საქართველოს ყოფილ პრეზიდენტს ქართველი მომღერლის სოფო ნიჟარაძისგან კიდევ ერთი ქალიშვილი ელის მარია ჰყავს.
სოფო ნიჟარაძე 2010 წელს, ნორვეგიაში „ევროვიზიის“ სიმღერის კონკურსზე საქართველოს წარმოადგენდა.
