პარლამენტის შეკრება არის უკანონო და ნებისმიერი გადაწყვეტილება, რომელსაც პარლამენტი ამ დროს მიიღებს, უკანონოა - ვახუშტი მენაბდე

მე-11 მოწვევის პარლამენტი 25 ნოემბერს, საპროტესტო აქციის ფონზე შეიკრიბა. მანამდე საქართველოს პრეზიდენტმა საკონსტიტუციო სასამართლოში არჩევნების ფარულობასა და საყოველთაობის დარღვევასთან დაკავშირებით სარჩელი შეიტანა. კონსტიტუციონალისტი ვახუშტი მენაბდე TIA.GE- თან ამბობს, რომ  პარლამენტის მიერ საკუთარი უფლებამოსილების ცნობა უკანონოა, რადგან საკონსტიტუციო სასამართლო არჩევნების კონსტიტუციურობის დავას განიხილავს და 150-ვე დეპუტატის მანდატის კანონიერება გასაჩივრებულია. 

- მე ვფიქრობ, რომ პარლამენტის შეკრება ეწინააღმდეგებოდა საქართველოს პარლამენტის საქმიანობის მარეგულირებელ კანონმდებლობას, ამიტომ ეს შეკრება არის უკანონო და ნებისმიერი გადაწყვეტილება, რომელსაც მიიღებს პარლამენტი ამ დროს შესაბამისად, არის უკანონი.

- პრეზიდენტის არჩევაც?

- ნებისმიერი გადაწყვეტილება, რომელსაც ეს პარლამენტი მიიღებს, მათ შორის პრეზიდენტის არჩევა ჩემი აზრით, ლეგალური გადაწყვეტილება არ იქნება

- რა მოხდება თუ საკონსტიტუციო სასამართლომ პრეზიდენტის სარჩელი დააკმაყოფილა?

- ამ შემთხვევაში არჩევნები არაკონსტიტუციურად გამოცხადდება. შესაბამისად, პარლამენტიც არაკონსტიტუციურად არჩეული იქნება და არჩევნები ბათილად ცნობილი იქნება, თუმცა მოვლენების ასეთი განვითარება არ წარმომიდგნია.

- რა გველის იმ შემთხვევში თუ მსოფლიომ პარლამენტის ლეგიტიმურობა არ ცნო?

- თუ ეს არჩევნები დასავლეთმა არ ცნო, მაშინ დასავლეთისგან იზოლაციაში მოვექცევით. ზოგადად, როდესაც პარლამენტიდან უმრავლესობა არა კანონებზე, არამედ ძალადობაზე დაყრდნობით მართავს, იურისტის კონსულტაცია ტყული დროის ხარჯვაა.