ამ ამბის განხილვას არ ვაპირებ, ამის გამო არც პოლიციაში ვაპირებ მისვლას - რას წერს ტორესა მოსი მწერალთა სახლში მომხდარი შემთხვევის შესახებ?
მწერალთა სახლის დირექტორის, ქეთი დუმბაძის შვილმა, ნოდარ მაჭარაშვილმა, მწერალ ტორესა მოსს ფიზიკური შეურაცხყოფა მიაყენა.
აღნიშნულთან დაკავშირებით ტორესამ რამდენიმე წუთის წინ სოციალურ ქსელში განცხადება გაავრცელა. მწერალი და ტელეწამყვანი წერს, რომ ჩივილს არ აპირებს და საზოგადოებამ თავად ნახა, რა მოხდა ადგილზე
- მადლობა ყველას მოკითხვისა და კეთილი სიტყვებისთვის. კარგად ვარ, მშვიდად და მხნედ ვგრძნობ თავს, ჩემს გულს არ ეკარება სიძულვილი. ამ ამბის განხილვას არ ვაპირებ, რა თქმა უნდა, ამის გამო არც პოლიციაში ვაპირებ მისვლას. ზუსტად ვიცი, რისთვის ვიბრძვი, ზუსტად ვიცი, რომ ჩემი არც ერთი საჯარო მოქმედება არაა ნაკარნახევი არც ვინმეს სიძულვილით და არც პირადი ანგარებით. მე გავიზარდე ეკლესიის წიაღში და ღრმად მწამს, რომ უფლის სიტყვა და სიყვარული ყოველ ადამიანს გაუძღვება ჭეშმარიტების ნათლისაკენ.
ჩემი ერთადერთი მისია ამ ქვეყნად არის ადამიანების მოწოდება სიყვარულისა და განათლებისაკენ. განვაგრძობ ჩვენს საერთო ბრძოლას, რომელიც მჯერა დასრულდება ქართველი ხალხის გამარჯვებით. იდექით მხნედ და მტკიცედ და არ შეუშვათ თქვენ გულში სიძულვილი. გასაგებია ჩემთვის ინტერესი, რის გამოც ჟურნალისტები მირეკავთ, მაგრამ ამ საკითხზე მეტს აღარაფერს ვიტყვი, საზოგადოებამ ნახა ყველაფერი და აქ განსახილველი აღარაფერია.
თუ ვინმე ღელავს ჩემი მხრიდან შურისძიებაზე, შეუძლია იყოს მშვიდად, რადგან ჩემი ფილოსოფია გულისხმობს ადამიანების მოწოდებას სიყვარულისკენ და არა შურისგებისკენ. თქვენთან ერთად განვაგრძობ პრინციპულ და უკომპრომისო ბრძოლას ამ ქვეყნის ევროპული მომავლისა და დემოკრატიისთვის, თუნდაც ეს სიცოცხლის ფასად დამიჯდეს.
"პირველითგან იყო სიტყუაი, და სიტყუაი იგი იყო ღმრთისა თანა, და ღმერთი იყო სიტყუაი იგი. ესე იყო პირველითგან ღმრთისა თანა. ყოველივე მის მიერ შეიქმნა, და თჳნიერ მისა არცა ერთი რაჲ იქმნა, რაოდენი-რაჲ იქმნა. მის თანა ცხორებაჲ იყო და ცხორებაჲ იგი იყო ნათელ კაცთა. და ნათელი იგი ბნელსა შინა ჩანს, და ბნელი იგი მას ვერ ეწია." იოანეს სახარება (თავი 1. 1-5).- წერს ტორესა მოსი.
