„ბედნიერია ჩემი თაობა, რომელსაც შვილებთან ერთად შვილიშვილებმაც აჯობეს. ეს კი იმას ნიშნავს, რომ საქართველო გაიმარჯვებს“ - ლევან ბერძენიშვილი

„ადრე ნათქვამი მაქვს, რომ შვილებმა გვაჯობეს. ახლა ისიც უნდა ვაღიარო, რომ ჩვენს შვილებსაც აჯობეს შვილებმა“, – წერს ფილოსოფოსი ლევან ბერძენიშვილი სოციალურ ქსელში, რითაც საქართველოში მიმდინარე მოვლენებს ეხმაურება.

„ამ უმძიმეს ღამეებს სინათლეს მატებს ის, რომ საოცარი ახალგაზრდობა გვყავს. ამას ვერაფერი ვერ შეცვლის – ვერც მარბიელთა დაუნდობლობა, ვერც დაპატიმრებულთა არმია, ვერც მოსამართლეთა დაცემა, ვერც სამთავრობო მედიის გათახსირება, ვერც უზნეო და უსულგულო დიქტატორის ბოროტი ფანტაზია.

ანტიკური თეატრის თეორიაში იყო ცნება – პერიპეტია, გარდატეხა, როდესაც ბედისწერა ერთ წამში არსებითად იცვლება. ჩვენს თვალწინ სწორედ ეს მოხდა.

ბედნიერია ჩემი თაობა, რომელსაც შვილებთან ერთად შვილიშვილებმაც აჯობეს. ეს კი იმას ნიშნავს, რომ საქართველო გაიმარჯვებს, საქართველო უკვდავია!“, – წერს ლევან ბერძენიშვილი.

ცნობისთვის, უკვე მეშვიდე დღეა რუსთაველის გამზირზე საპროტესტო აქციები მიმდინარეობს. მოქალაქეების პროტესტი მოჰყვა მთავრობის გადაწყვეტილებას, 2028 წლის ბოლომდე დღის წესრიგში არ დააყენოს ევროკავშირთან მოლაპარაკების გახსნის საკითხი.