ინოვაციური გათბობის სისტემები - მონაცემთა ცენტრების თბური გამონაშვები და მისი ეკოლოგიური მნიშვნელობა
ბიტკოინების მაინინგს, მონაცემთა ცენტრებსა და AI მანქანებს ელექტროენერგია სჭირდებათ, როგორც ფუნქციონირებისთვის, ასევე მათი მუდმივად გაგრილებისთვის. სიცხე კი მათი ენერგოინტენსიური პროცესების ბუნებრივი შედეგია.
ზოგიერთი კომპანია ცდილობს, კრეატიული გადაწყვეტილებებით არ დაუშვას ზედმეტი თერმული ენერგიის ფუჭად დახარჯვა და მას საცხოვრებელი და კომერციული სივრცეების გასათბობად იყენებს.
შესაძლოა, მონაცემთა ცენტრების ეს თბური გამონაშვი გახდეს უფრო ეკომეგობრული გათბობის საშუალება?
კლიმატის ექსპერტები სკეპტიკურად უყურებენ იმ იდეას, რომ გაზრდილი მოხმარება ყველაზე მდგრადი გამოსავალია. დამატებითი ენერგიის მოხმარება, რომელიც საკმარისი იქნებოდა მთელი კუნძულოვანი ქვეყნის უზრუნველსაყოფად, ნეგატიურ გავლენას მოახდენს ჩვენს კლიმატზე. თუმცა, ფინეთის სანაპირო ქალაქ ჰამინაში (20,000 მოსახლით) Google უფრო მდგრადი გადაწყვეტის ძიებაშია თავისი მონაცემთა ცენტრისთვის. აქ Google ზღვის წყალს ამოტუმბავს ახლომდებარე ნავსადგურიდან, რათა მონაცემთა ცენტრის სერვერები გააგრილოს. შემდგომში, გახურებული წყალი მილებში გროვდება და მისი სითბო ნაწილდება როგორც Google-ის მიმდებარე ოფისებში, ასევე ადგილობრივ ენერგოკომპანიაში. ამ პროცესის შედეგად, ჰამინას რაიონის 80%-ზე მეტი სახლი Google-ის მონაცემთა ცენტრის თბური გამონაშვებით თბება.
გარდა ამისა, ცენტრი 97%-ით ნახშირბადნეიტრალური ელექტროენერგიით მუშაობს 2022 წლიდან, რისთვისაც ადგილზე განთავსებული ქარისა და მზის ენერგიის წყაროებს იყენებს.
მსგავსი მეთოდი გამოიყენება ფინეთის სატაკუნტას რეგიონში, სადაც Marathon Digital Holdings, კრიპტოვალუტის მაინინგის კომპანია, თავის ჭარბ სითბოს ადგილობრივი მოსახლეობის 11,000-მდე ბინადრისთვის პასიურ ენერგიად ყიდის.
პარიზში ახლადაშენებული ოლიმპიური წყლის სპორტის ცენტრის აუზი Equinix-ის მონაცემთა ცენტრის მიერ გამომუშავებული სითბოს ნარჩენებით თბება. ამერიკულმა კომპანიამ ადგილობრივ ენერგეტიკულ კომპანიასთან თანამშრომლობით გადაწყვიტა, ეს ენერგია სენ-სენ-დენისის გარეუბანს მიაწოდოს – სრულიად უფასოდ პირველი 15 წლის განმავლობაში.
