როდესაც ბინების ჭრილში ფასების შემცირებაზე ვსაუბრობთ, მოთხოვნაზე მნიშვნელოვანი თვითღირებულებაა, დღესდღეობით კი თვითღირებულების ყველა კომპონენტი გაძვირებულია - ნატო ბოჭორიშვილი

უძრავი ქონების ბაზარზე მოთხოვნის კლების ტენდენცია თებერვალშიც შენარჩუნდა. გასულ თვეს თბილისში წლიურად ბინების გაყიდვები თითქმის 9%-ით იყო შემცირებული, თუმცა უძრავი ქონების ეროვნული ასოციაციის პრეზიდენტის განცხადებით, მიმდინარე ორ თვეში ბინების გაყიდვების კლება დრამატული არ ყოფილა და მარტში უძრავი ქონების ბაზარზე მოთხოვნის გააქტიურება შეიმჩნევა. თემაზე TIA.GE - საქართველოს უძრავი ქონების ეროვნული ასოციაციის პრეზიდენტი ნატო ბოჭორიშვილი ესაუბრა:

_ ზოგადად, ყოველი წლის ჭრილში იანვარი და თებერვალი აქტიური არ არის ხოლმე.  წინა წლის იანვართან და თებერვალთან შედარებით, წელს მცირე შემცირებებია, თუმცა ეს  დრამატული და საგანგაშო მაჩვენებელი არაა, რომელსაც აუცილებლად ყურადღება უნდა მივაქციოთ. 
შემცირებების მიზეზი ქვეყანაში ბოლო თვეებში განვითარებული მოვლენების გარდა, მსოფლიოში მიმდინარე მოვლენებია. ზოგადად, მარტის თვეს თუ შევხედავთ, დეველოპერული მიმართულებით ტრანზაქციების განხორციელება  საკმაოდ აქტიურად დაიწყო და ვთვლი, რომ დაგროვილი მოთხოვნა, რომელიც ქვეყანაში არსებობს, ნელ-ნელა გამოყენებას პოვებს და უძრავი ქონების ბაზარი უფრო გააქტიურდება.
_ თბილისში ბინის ქირა გაიაფდა, კომერციული ფართების მიმართულებით რა მდგომარეობაა?
_ კომერციული ფართები ორ ნაწილად გავყოთ: საოფისე და ე.წ. რითეილის ფართებად. როცა ჩვენ ვსაუბრობთ საოფისე ფართებზე, ბაზარზე საკმაოდ ბევრი ვაკანტური ფართი გამოჩნდა. ჩემი აზრით, ერთი-ორი თვე მაინც უნდა დავაკვირდეთ ბაზარს და ვნახოთ სიტუაცია როგორ განვითარდება იმიტომ, რომ ალბათ ორი თვის მერე უფრო სწორი იქნება, რომ გავაკეთოთ შეფასება იმ ფართების მიხედვით, რომლებიც ამ პერიოდში გაქირავდება. საოფისე ფართების მიმართულებით იანვარი და თებერვალი ყველაზე ნაკლებად აქტიური თვეებია იმიტომ, რომ ამ პერიოდში კომპანიები როგორც წესი, ოფისებს არ იცვლიან. აქტიურობა უფრო გაზაფხულზე შეინიშნება ხოლმე და მეც მიმაჩნია, რომ საოფისე ფართების ბაზარი ახლა გააქტიურდება და მერე შევხედავთ როგორი ფასები დადგინდება და დასტაბილურდება. დღევანდელი მონაცემებით არ გვაქვს ისეთი სიტუაცია, რომ რაღაცა დრამატული ცვლილებები და მნიშვნელოვანი შემცირებებია, მაგრამ აჯობებს მოვლენების განვითარებას დაველოდოთ.
_ თბილისის გარეთ, სხვა ქალაქებში რა მდგომარეობაა?
- საქართველოში ძირითადად, ორი ქალაქი - ბათუმი და თბილისი ვითარდება. ნელ ნელა, ქუთაისმაც წამოიწია. ახალციხეში, მარნეულში და გორში მცირე მშენებლობები მიმდინარეობს, ამიტომ ამ ქალაქების ერთმანეთთან შედარება რელევანტური არ მგონია. მესმის, რომ მოთხოვნა მნიშვნელოვნად განსაზღვრავს ფასს, მაგრამ როდესაც ბინების ჭრილში ფასების შემცირებაზე ვსაუბრობთ, მოთხოვნაზე მნიშვნელოვანი თვითღირებულებაა და დღესდღეობით, თვითღირებულების ყველა კომპონენტი გაძვირებულია და ტენდენცია ისეთია, რომ კიდევ მოიმატებს. ამიტომ მე ფასების დაკლებას არ ველოდები. უბრალოდ არ არის ამის საშუალება და მიმაჩნია, რომ ფასების კლება ნაკლებ სავარაუდოა.
_ ბინის გაყიდვებზე უკრაინაში ომის დასრულება და მეზობელი სახელმწიფოებიდან ჩამოსულების უკან დაბრუნება როგორ აისახება?
_ დავიწყოთ იმით, რომ უკრაინის მოსახლეობა ჩვენთან მცირე რაოდენობით არის წარმოდგენილი და მათი დაბრუნება ბაზარზე დიდ გავლენას ვერ მოახდენს. რაც შეეხება რუსეთის მოქალაქეებს, მათი უმრავლესობა უკვე დაბრუნდა, ნაწილმა კი მეტ-ნაკლებად ფეხი მოიკიდა. მგონია, რომ ეს ფაქტორი პირველად, დეველოპერების ბაზარზე, რომელიც თვითღირებულების ზრდას განიცდის, მნიშვნელოვან გავლენას არ მოახდენს და თუ რაიმე გავლენას მოახდენს, ალბათ მეორეული ბაზარია.
- გმადლობთ.