Transfermarkt-მა ფასები განაახლა - როგორ შეიცვალა ქართველი ფეხბურთელების ფასი?

Transfermarkt-მა საფრანგეთის ლიგა 1-ის ფეხბურთელების სატრანსფერო ფასები განაახლა.

,,პარი სენ ჟერმენის'' შემტევი, ხვიჩა კვარაცხელია 80 მილიონ ევროდაა შეფასებული. მისმა ღირებულებამ, წინა მონაცემებთან შედარებით, 5 მილიონით დაიკლო, თუმცა საფრანგეთის ჩემპიონატში ქართველ ფეხბურთელზე ძვირადღირებული არავინაა.

2 მილიონი ევროთი - 18-დან 20 მილიონამდე გაიზარდა გიორგი მიქაუტაძის ფასი. გარდა ამისა, ასევე 2 მილიონით მოიმატა ზურიკო დავითაშვილის ღირებულებამაც, რომელიც ამ მომენტისთვის 10 მილიონადაა შეფასებული.

აღსანიშნავია, რომ ლიგა 1-ის 11 ყველაზე ძვირადღირებული ფეხბურთელი ,,პარი სენ ჟერმენის საკუთრებაა.

საფრანგეთის ჩემპიონატის 10 ყველაზე ძვირადღირებული ფეხბურთელი Transfermarkt-ის ვერსიით:

ხვიჩა კვარაცხელია - 80 მილიონი ევრო

უსმან დემბელე - 75 მილიონი ევრო

ბრედლი ბარკოლა - 70 მილიონი ევრო

აშრაფ ჰაკიმი - 65 მილიონი ევრო

ჟოაო ნევეში - 65 მილიონი ევრო

ვიტინია - 60 მილიონი ევრო

უორენ ზაირ-ემერი - 60 მილიონი ევრო

დეზირე დუე - 60 მილიონი ევრო

ნუნუ მენდეში - 55 მილიონი ევრო

გონსალუ რამოში - 45 მილიონი ევრო

არსებული ცვლილებებიდან გამომდინარე საქართველოს ეროვნული ნაკრების ღირებულება €192 მილიონი ევროდან €181 მილიონამდე ჩამოვიდა, თუმცა სომხეთის ნაკრების დამარცხების შემდეგ FIFA-ს რეიტინგში “ჯვაროსნები” 2 პოზიციით, 68-დან 66 ადგილამდე დაწინაურდნენ.

შეგახსენებთ, რომ ივნისში გასამართი ამხანაგური თამაშების შემდეგ ნაკრები 4 სექტემბერს მსოფლიოს ჩემპიონატის საკვალიფიკაციო ეტაპს თურქეთის წინააღმდეგ დაიწყებს.