ტრამპის ტარიფების გამო, ყველაზე დიდი ზარალი Porsche-სა და Mercedes-ს მიადგებათ - Bloomberg

ტრამპის მიერ ავტოიმპორტზე ტარიფების დაწესება ყველაზე მძიმედ Porsche-სა და Mercedes-Benz Group-ზე აისახება, პოტენციური ზარალის მოცულობა კი $3.7 მილიარდია - ამის შესახებ Bloomberg-ი იტყობინება.

ტრამპის მიერ დაწესებული 25%-იანი გადასახადი, რომელიც ძალაში 3 აპრილიდან შევა, Porsche-სა და Mercedes-ის 2026 წლის საოპერაციო პროგნოზირებულ შემოსავალს, სავარაუდოდ, მეოთხედით შეამცირებს. ზარალის შესამცირებლად კომპანიებს ფასების ზრდა ან წარმოების აშშ-ში გადატანა მოუწევთ.

ტარიფები ევროპული ავტომწარმოებლების აშშ-ის მოგებიან ბაზარზე დამოკიდებულებას უქმნის საფრთხეს. ყველაზე დიდი რისკის წინაშე გერმანული კომპანიები დგანან, რადგან აშშ-ში ყველაზე მეტი ავტომობილი, მათ შორის Porsche 911 სპორტული ავტომობილები და Mercedes S Class-ის სედანები, სწორედ ამ ქვეყნიდან იგზავნება.

ტარიფების გამოცხადების შემდეგ Porsche-სა და Mercedes-ის აქციები ფრანკფურტის საფონდო ბირჟაზე 5.7%-ით დაეცა, BMW-ს აქციები - 4.9%-ით, ლონდონში Aston Martin-ის აქციები კი 8.9%-ით შემცირდა.

გერმანელი ავტომწარმოებლების დიდი ნაწილი ქარხნებს აშშ-ს ტერიტორიაზეც ფლობენ, რითაც როგორც ადგილობრივი ბაზრის, ისე საექსპორტო ბაზრების მოთხოვნას აკმაყოფილებენ. ვიდრე ევროკავშირი საპასუხო ნაბიჯებისთვის ემზადება, დაწესებულმა ტარიფებმა შესაძლოა, ძლიერად დაარტყას ინდუსტრიას, რომელიც ისედაც ებრძვის გაძვირებულ ფასებსა და შემცირებულ მოთხოვნას.