Galt & Taggart-მა 2025 წლის ინფლაციის პროგნოზი 3.7%-მდე შეამცირა

Galt & Taggart-მა 2025 წლის ინფლაციის პროგნოზი შეამცირა. 2025 წელს საინვესტიციო ბანკი პროგნოზირებს, რომ საშუალო წლიურ ინფლაცია 3.7% იქნება, მანამდე საპროგნოზო მაჩვენებელი 3.9% იყო.

თებერვალში წლიური ინფლაცია 2.4%-მდე გაიზარდა, ზრდა ძირითადად გამოწვეული იყო ადგილობრივი პროდუქციის ინფლაციით, რომელიც 3%-მდე გაიზარდა, ასევე გაიზარდა იმპორტირებულ პროდუქციაზე ინფლაციაც.

საინვესტიციო ბანკის ეკონომისტი ლაშა ქავთარაძე "საქმიან დილაში" აცხადებს, რომ ინფლაციის მაჩვენებლის შემცირება ლარის კურსის საპროგნოზო მაჩვენებლის კორექტირებამ გამოიწვია.

"ინფლაცია იანვარსა და თებერვალში ჩვენს პროგნოზზე ცოტათი დაბალი იყო. ამასთან ერთად გადავხედეთ გაცვლით კურსს, რომელიც გამყარების მიმართულებით წამოვიდა. ჩვენი საშუალო პროგნოზი ლარის კურსის დოლართან მიმართებით 2025 წელს 2.88 ლარი იყო, ეს მცირედით დაკორექტიდა 2.85-მდე. იმის გამო, რომ იანვარ-თებერვალში დაბალი იყო ინფლაცია, გაცვლითი კურსი მცირედით არის გამყარებული [საბაზისო სცენართან შედარებით], ამან გამოიწვია საშუალო წლიური ინფლაციისა 3.9%-დან 3.7%-მდე შემცირება. ეს ნიშნავს, რომ მარტიდან უნდა ველოდოთ ინფლაციას 3%-ზე ზემოთ და არ არის გამორიცხული გარკვეულ თვეებში 4%-ზე მაღალიც იყოს", - ამბობს ქავთარაძე.