„ასეთი ტენდენცია ნამდვილად არსებობს“ - თბილისის ცენტრსა და გარეუბნებში მდებარე ბინების ფასში სხვაობა მცირდება

რატომ მცირდება თბილისის ცენტრალურ უბნებსა და გარეუბნებში მდებარე ბინების ფასში სხვაობა, როგორ მოქმედებს მეტროსთან, ბაზართან, სკოლასთან და საბავშვო ბაღთან სიახლოვე ბინის ფასზე და რატომ აღარ მუშაობს ბინების გაცვლის პრაქტიკა? - ამ და სხვა თემებზე TIA.GE-ს უძრავი ქონების კომპანია Realtor.ge -ს წამყვანი რეალტორი მაია ვაშაკიძე ესაუბრა:

_ ბოლო ათი წლის განმავლობაში გლდანის უძრავი ქონების ფასი საგრძნობლად გაიზარდა და თითქმის პრესტიჟული უბნების ფასებს დაეწია. რატომ მცირდება ცენტრისა და გარეუბნების ბინის ფასში სხვაობა?

_ ასეთი ტენდენცია ნამდვილად შეინიშნება. მაგალითად, ნაძალადევის რაიონში, ახალ აშენებულ კორპუსში კვადრატული  თეთრი კარკასი 1300 დოლარზე ნაკლები არ ღირს. ამ დროს, საბურთალოზე, ნუცუბიძის ტერიტორიაზე და პლატოებზე ჩვეულებრივ, ახალაშენებულ კორპუსში ბინის შეძენა 1300-დან 1500-მდე არის შესაძლებელი. გლდანში და დიდ დიღომშიც კვადრატული მეტრის ფასი 1100-დან 1300-მდე მერყეობს. ვგულისხმობ ნაკლებად ცნობილი კომპანიის სახლებს, რომელსაც ერთი ან ორი კორპუსი აქვს აშენებული და არა ცნობილი ბრენდების კორპუსებს. ასეთი ტენდენციის მიზეზი ალბათ ისაა, რომ სამშენებლო მასალა გაძვირდა და გარეუბნებზე მოთხოვნა არსებობს. 

- მეტროს, ბაზრის, სკოლის და საბავშვო ბაღის სიახლოვე  ბინის ფასზე გავლენას ახდენს?

_ რა თქმა უნდა. როგორც კი ინფრასტრუქტურა ვითარდება და უმჯობესდება, ბინის ფასი  მაღლა იწევს. გლდანში ბინის ფასების ზრდის ერთ-ერთი მიზეზი სწორედ ისაა, რომ ყველაფერი ადგილზეა და მოსახლეობას უბნიდან გასვლა არ უწევს. 

- ბოლო წლებში, ქალაქგარეთ მდებარე ნაკვეთებზე მოთხოვნა ძალიან გაიზარდა. ამის მიზეზი რა არის?

_ მიზეზი ისაა, რომ გადატვირთული მოძრაობიდან და საცობებიდან გამომდინარე, ადამიანები ცდილობენ ქალაქს გაერიდონ, მშვიდი ადგილი მოძებნონ და სამსახურში იქიდან იარონ. ვფიქრობ, რომ წყნეთი,საგურამო, ნატახტარი, ბულაჩაური და მიმდებარე ტერიტორიები ხალხისთვის საინტერესოა. აქ ნებისმიერი ადამიანი იპოვის გარემოს, სადაც შეიძლება დამღლელი დღის შემდეგ მეგობრებთან ერთად დაისვენოს და ისიამოვნოს.

- წლების წინ არსებობდა ბინების გაცვლის პრაქტიკა, რომელმაც ბოლო დროს აქტუალურობა დაკარგა. თქვენი აზრით, რა არის ამის მიზეზი?

_  დიდი ხნის წინ ბინების გაცვლის პრაქტიკა ნამდვილად არსებობდა, მაგრამ მე მსგავსი შეთხვევა არ მქონია და ვფიქრობ, რომ დღეს ეს მიდგომა არ ამართლებს. გაცვლა რამდენიმე ბინის მეპატრონეს უხსენებია, მაგრამ არასოდეს განხორციელებულა. ასეთ შემთხვევაში ბინის მეპატრონეს ვურჩევთ, რომ ჯერ თავისი ბინა გაყიდოს და მერე სხვა იყიდოს იმიტომ, რომ ადამიანების მოთხოვნები და გემოვნება ძალიან იშვიათად ემთხვევა.

- ბინის გირავნობაზე მოთხოვნა თუ არსებობს? 

_ ბინის გირავნობაზე ინტერესი მაღალია, მაგრამ ჩვენ ამაში ჩართულები არ ვართ რადგან ცოტა გაუმართავი საკითხია. იშვიათად გვხვდება რეალური მესაკუთრე, რომელსაც თანხა გარკვეული დროით სჭირდება და მზად არის ამ დროის შემდეგ დააბრუნოს. 

_ შეუძლია თუ არა მეზობელს, რომ ბინის ყიდვის ან გაყიდვის დროს პრობლემა შექმნას და ასეთი შემთხვევა თუ გქონიათ? 

_ მეზობელს ძალიან დიდი მნიშვნელობა აქვს, ამიტომ ვფიქრობ, რომ ასეთი რამ სრულიად შესაძლებელია. შეიძლება ბინას იმიტომ ყიდით, რომ ზედა სართულიდან ყოველ დღე წყალი ჩამოდის ან მეზობელი მთელი დღე ჩხუბობს, ხმაური გაწუხებთ და მდგომარეობა გაუსაძლისია.. მოკლედ, მიზეზი შეიძლება ბევრნაირი იყოს. არც  ის არის გამორიცხული, რომ  ბინის შეძენა მას უნდოდა და გაყიდვაში ხელს გიშლით  იმიტომ, რომ როცა ამის დრო მოვა, თავად შეიძინოს. ბევრი მიზეზი შეიძლება იყოს, თუმცა ჩემს პრაქტიკაში ასეთი შემთხვევა არ მახსენდება. 

თბილისში უძრავი ქონების ბაზრის აქტივობა უბნების მიხედვით განსხვავდება. ერთ დროს ნაკლებად მოთხოვნადი უბნები დღეს გაყიდვებში ლიდერობენ. მოთხოვნის პარალელურად იზრდება ფასებიც, რაც  სტატისტიკაშიც აისახა. შარშან თბილისში ახალაშენებული ბინების საშუალო შეწონილი გასაყიდი ფასი გარეუბნებში 12%-ით გაიზარდა, ქალაქის ცენტრსა და ფართო ცენტრში კი 6% და 4%-იანი ზრდა დაფიქსირდა.