წელს საქართველოს საზღვარი 12 097 ტრაილერით ნაკლებმა გადაკვეთა - რამდენი ლარი შევიდა ბიუჯეტში
წელს იანვარ-ივნისში სატვირთო ავტომობილების გატარებიდან ბიუჯეტში 83 050 696 ლარი შევიდა, რაც გასული წლის იგივე პერიოდთან შედარებით თითქმის 5%-ით ნაკლები მაჩვენებელია.
ნაერთი ბიუჯეტის შემოსულობების მიხედვით (კონსოლიდაციის გარეშე) 2024 წლის იანვარ-ივნისში ხაზინაში ტრაილერების გატარებიდან 87 284 688 ლარი შევიდა.
შესაბამისად, ბიუჯეტში გზათსარგებლობის საფასურით მიღებული შემოსავალი 2025 წლის 6 თვეში, წინა წლის ანალოგიურ პერიოდთან შედარებით, 4.2 მლნ ლარით შემცირდა.
არსებული ფინანსური მაჩვენებლებიდან გამომდინარე, 2025 წლის იანვარ-ივნისში საქართველოს დერეფანი 237 287-მა სატვირთომ გადაკვეთა, წინა წლის ანალოგიურ პერიოდში კი 249 384-მა ტრაილერმა. გამოდის, წელს, ქვეყნის საზღვარი 12 097 ტრაილერით ნაკლებმა გადაკვეთა.
ცნობისთვის, საქართველოს საზღვარზე სატრანზიტო ტრაილერებისთვის გზათსარგებლობის მოსაკრებელი 350 ლარს შეადგენს. აღნიშნული ტარიფი 2022 წლის 20 ივნისიდან მოქმედებს. მანამდე მძღოლებს 200 ლარის გადახდა უწევდათ.
