კინორეჟისორი ელდარ შენგელაია 92 წლის ასაკში გარდაიცვალა

კინორეჟისორი ელდარ შენგელაია 92 წლის ასაკში გარდაიცვალა. 

მისი შემოქმედება არაერთ უნიკალურ ნამუშევარს მოიცავს, მათ შორისაა: „არაჩვეულებრივი გამოფენა“, „შერეკილები“, „სამანიშვილის დედინაცვალი“ და „ცისფერი მთები, ანუ დაუჯერებელი ამბავი“. 

ელდარ შენგელაიამ კინორეჟისორის უმაღლესი განათლება მოსკოვში, კინემატოგრაფიის საკავშირო სახელმწიფო ინსტიტუტში, მიიღო. 1957–1959 წლებში მუშაობდა კინოსტუდია „მოსფილმში“. 1960 წლიდან გადავიდა კინოსტუდია „ქართულ ფილმში“. თავისი სადებიუტო ფილმი მან გადაიღო თამაზ მელიავასთან ერთად 1963 წელს. „თეთრი ქარავანი“ მწყემსთა ცხოვრების სირთულეს აღწერს. შენგელაიას შემდეგი ნამუშევარი იყო დავით კლდიაშვილის მოთხრობის „მიქელას“ ეკრანიზაცია (1964) მოგვიანებით, 1977 წელს ის კვლავ დაუბრუნდა კლდიაშვილის შემოქმედებას და გადაიღო „სამანიშვილის დედინაცვალი“ (1977). შენგელაიამ სახელი გაითქვა დრამატურგ რეზო გაბრიაძესთან თანამშრომლობით. მათ ერთობლივად შექმნეს კომედიური ფილმები „არაჩვეულებრივი გამოფენა“ (1968) და „შერეკილები“ (1973).