თბილისის მერია აღმაშენებლის გამზირის ნაწილის რეაბილიტაციას გეგმავს

თბილისის მერია აღმაშენებლის გამზირის თამარ მეფის გამზირიდან მარჯანიშვილის მოედნის ჩათვლით არსებული საგზაო მონაკვეთის რეაბილიტაციას გეგმავს.

როგორც თბილისის მერმა კახა კალაძემ დედაქალაქის მთავრობის სხდომაზე განაცხადა, სარეაბილიტაციო სამუშაოების შესყიდვის მიზნით ტენდერი უკვე გამოცხადებულია. სატენდერო განაცხადების მიღება 3 სექტემბერს დასრულდება.

შეგახსენებთ, შესყიდვის სავარაუდო ღირებულება 6 696 865 ლარია. დაფინანსების წყარო თბილისის 2026 წლის ბიუჯეტია. წინადადებების მიღება 29 აგვისტოს დაიწყება და 3 სექტემბერს დასრულდება.

პროექტის ფარგლებში დაგეგმილია აღმაშენებლის გამზირის აღნიშნულ მონაკვეთზე საგზაო ინფრასტრუქტურის განახლება. კერძოდ, მოწესრიგდება სანიაღვრე ქსელი, რეაბილიტაცია ჩაუტარდება ტროტუარებსა და საავტომობილო გზას.

თბილისის მერიის ინფორმაციით, არსებული დაზიანებული ქვაფენილი ახალი ასფალტის საფარით ჩანაცვლდება. ასევე, მოეწყობა ველობილიკი.

პროექტი გარე განათების ქსელის განახლებასაც ითვალისწინებს. გამზირზე დამონტაჟდება LED სანათები, ხოლო მარჯანიშვილის მოედანზე განახლდება გამწვანების კუნძულები და შესაბამისი ინფრასტრუქტურა.

ამასთან, სარეაბილიტაციო სამუშაოების ფარგლებში ინფრასტრუქტურა შშმ პირებისთვის ადაპტირდება.

„ჩვენ აქტიურად ვაგრძელებთ ინფრასტრუქტურული პროექტების განხორციელებას დედაქალაქის სხვადასხვა რაიონსა და უბანში. ჩვენი მიზანია, ქალაქში შევქმნათ მოწესრიგებული, უსაფრთხო და თანამედროვე გარემო, რომელიც ყოველდღიურად ჩვენი მოქალაქეების ინტერესებს მოემსახურება და, რაც მთავარია, ათეულ წლებს გაუძლებს.

ამჯერად, ვგეგმავთ აღმაშენებლის გამზირის მნიშვნელოვანი მონაკვეთის რეაბილიტაციას - თამარ მეფის გამზირიდან მარჯანიშვილის მოედნის ჩათვლით. პროექტის ფარგლებში, მოწესრიგდება სანიაღვრე ქსელი, რეაბილიტაცია ჩაუტარდება ტროტუარსა და საავტომობილო გზას, არსებული დაზიანებული ქვაფენილი ასფალტის ახალი საფარით ჩანაცვლდება. მოეწყობა ველობილიკი.

ასევე, განახლდება გარე განათების ქსელი და დამონტაჟდება LED ლამპიონები. მოედანზე განახლდება გამწვანების კუნძულები და ინფრასტრუქტურა ადაპტირდება შშმ პირებისთვის“, - განაცხადა კახა კალაძემ.

თბილისის მერმა სარეაბილიტაციო სამუშაოების შესყიდვის მიზნით გამოცხადებულ ტენდერში მონაწილეობა ყველა დაინტერესებულ და კვალიფიციურ კომპანიას მოუწოდა.

რა პერსპექტივები უჩნდება უძრავი ქონების ბაზარს?

ინფრასტრუქტურული ცვლილებები ხშირად ხდება ტრიგერი უძრავი ქონების ბაზრისთვის. მიუხედავად იმისა, რომ თითოეული პროექტი ინდივიდუალურია, ყურადღება უნდა გავამახვილოთ რამდენიმე ფაქტორზე:

• საცხოვრებელი და კომერციული პოტენციალი - ისტორიულ უბნებში ინფრასტრუქტურის განახლება ქონების მფლობელებს უჩენს სტიმულს, უფრო ეფექტურად გამოიყენონ ფართები, რაც შესაძლოა დადებითად აისახოს როგორც გაქირავების ტარიფებზე, ისე ბინების საბაზრო ღირებულებაზე.
• ტურისტული და საინვესტიციო ინტერესი - აღმაშენებლის გამზირი და მისი მიმდებარე უბნები ყოველთვის მაღალი ინტერესის ზონად რჩება. შესაბამისად, ინფრასტრუქტურის გაუმჯობესება შეიძლება გახდეს დამატებითი არგუმენტი იმ პირებისთვის, ვინც განიხილავს ინვესტიციას ისტორიულ უბნებში.
• ურბანული კომფორტი - საბოლოო ჯამში, ინფრასტრუქტურული პროექტების მთავარი მიზანი ქალაქის მაცხოვრებლებისთვის კომფორტული გარემოს შექმნაა. როდესაც უბანი ხდება უფრო ხელმისაწვდომი, სუფთა და მოწესრიგებული, იზრდება მოთხოვნა ამ უბანში ცხოვრებასა და საქმიანობაზე.

რას უნდა მიაქციონ ყურადღება ინვესტორებმა?

ისტორიულ ცენტრში უძრავი ქონების შეძენისას ან ქირაობისას გადაწყვეტილების მიღებისას მნიშვნელოვანია კომპლექსური ხედვა:

ინფრასტრუქტურული მდგრადობა - მნიშვნელოვანია, რამდენად გრძელვადიანი და სისტემურია დაგეგმილი რეაბილიტაცია.

უბნის ხასიათი - ისტორიულ უბნებს აქვთ საკუთარი "ხასიათი“. შესაბამისად, ინვესტირებისას უმჯობესია გავითვალისწინოთ, თუ რა მიმართულებით ვითარდება უბანი - ხდება ის უფრო მეტად ტურისტული, საცხოვრებელი თუ საქმიანი ჰაბი.

აღმაშენებლის გამზირის რეაბილიტაცია კიდევ ერთი მაგალითია იმისა, თუ როგორ ერწყმის ერთმანეთს ურბანული დაგეგმარება და უძრავი ქონების ბაზრის განვითარება. თუმცა, პროექტის საბოლოო ეფექტი დამოკიდებული იქნება იმაზე, თუ რამდენად ეფექტურად მოხდება ამ სივრცეების ინტეგრირება ქალაქის ყოველდღიურ ცხოვრებაში.