რა უჯდება მთავრობას 1 ლიტრი საწვავის შესყიდვა
ივნისში მთავრობას საწვავის შესყიდვა იგივე დაუჯდება, რაც მაისში. აღნიშნულს მოწმობს სახელმწიფო შესყიდვების სააგენტოს ვებგვერდზე გამოქვეყნებული ინფორმაცია, სადაც ჩანს, რომ გასულ თვეში გაფორმებული ხელშეკრულებით, ივნისში ბენზინისა და დიზელის ფასი მთავრობისთვის არ შეცვლილა, მიუხედავად იმისა, რომ პლატსის მიხედვით, ბენზინის ღირებულება გაზრდილია, ხოლო დიზელის შემცირებული.
უფრო კონკრეტულად, კონსოლიდირებული ტენდერის თანახმად, მთავრობა 1 ლიტრ სუპერის (ოქტანობა არანაკლებ 98) ტიპის საწვავს ივნისში 2.55 ლარად შეიძენს (მაისში 2.55 ლარი). ტენდერში გამარჯვებული „ვისოლ პეტროლიუმ ჯორჯიაა“.
რაც შეეხება საწვავის სხვა ტიპებს, კონსოლიდირებული ტენდერის მიხედვით, ივნისის კონტრაქტით, 1 ლიტრი პრემიუმ საწვავის ღირებულება 2.26 ლარია, მაისშიც 2.26 ლარი იყო. აქ გამარჯვებული „რომპეტროლ საქართველოა“.
ამავე მონაცემების მიხედვით, ევრო რეგულარის ტიპის საწვავს კი, მთავრობა ივნისში 2.24 ლარად შეიძენს, ისევე როგორც მაისში. გამარჯვებული კომპანიას „სოკარ ჯორჯია პეტროლიუმი წარმოადგენს.
რაც შეეხება ევროდიზელს (არაუმეტეს PPM 10), ფასი არსებულ მდგომარეობაში ერთ ლიტრზე 2.31 ლარია, (მაისშიც 2.31 ლარი იყო), ტენდერში გამარჯვებული „სან პეტროლიუმ ჯორჯიაა“.
როგორც ცნობილია, საქართველოს საცალო ბაზარზე საწვავის ფასი „პლატსის“ მიხედვით ანგარიშდება. იანვარში „პლატსის“ მიხედვით ბენზინის საშუალო ღირებულება ტონაზე 737.02 აშშ დოლარს, ხოლო დიზელზე 714.91 აშშ დოლარს შეადგენდა. თებერვალში - ბენზინის 726.55 დოლარი, ხოლო დიზელზე - 705.3 დოლარი იყო. მარტში ბენზინზე - 683.89 დოლარი, დიზელზე - 655.55 დოლარი; აპრილში „პლატსის“ მიხედვით ბენზინის ფასი 657.48 დოლარს, დიზელის კი 611.95 დოლარს შეადგენდა, ხოლო მაისში ბენზინის ღირებულება 671.79 დოლარი, დიზელის 603.40 დოლარი იყო.
