სურსათზე უნაღდო დანახარჯები 26%-ით გაიზარდა, საშუალო ჩეკი მაისში 16 ლარს შეადგენდა - როგორია სტატისტიკა
2025 წლის მაისში, „თიბისი ბანკის“ არხების მიხედვით, მომხმარებლებმა მეტი უნაღდო დანახარჯი გასწიეს, ვიდრე წინა წლის მაისში, - ამის შესახებ ვკითხულობთ „თიბისი კაპიტალის“ ბაზრის მიმოხილვაში.
კერძოდ, კვლევის თანახმად, მაისში ჯამური უნაღდო დანახარჯები წლიურად 26%-ით, ხოლო უნაღდო ტრანზაქციების რაოდენობა 19%-ით გაიზარდა.
„ამავე პერიოდში, ჯამური უნაღდო დანახარჯებში, „თიბისი ბანკის“ არხებით, რეზიდენტების წილი 86%-ს, ხოლო არარეზიდენტების წილი 14%-ს შეადგენდა“, - ვკითხულობთ პუბლიკაციაში.
აღსანიშნავია, რომ საანგარიშო პერიოდში ჯამური უნაღდო დანახარჯების უდიდესი წილი სურსათზე მოდიოდა. უფრო კონკრეტულად, მაისში რესტორნებზე ჯამური უნაღდო დანახარჯების 16%, ხოლო სურსათზე 28% მოდიოდა.
„ამავე პერიოდში, სურსათზე უნაღდო დანახარჯებში, „თიბისი ბანკის“ არხებით, წლიური 26%-იანი ზრდა დაფიქსირდა. საშუალო ტრანზაქციის ზომა 16 ლარია, ხოლო სურსათსა და უალკოჰოლო სასმელებზე ინფლაცია 8%-ს გაუტოლდა“, - აღნიშნულია კვლევაში.
ამასთანავე, მაისში ჯამური დანახარჯების უდიდესი ნაწილი - 63% სამომხმარებლო საქონელზე მოდის, სამომხმარებლო საქონელში კი სურსათის წილი 44%-ია.
„2025 წლის მაისში, „თიბისი ბანკის“ არხებით, ჯამური უნაღდო დანახარჯების განაწილებამ სამომხმარებლო საქონელსა და სერვისებზე, შესაბამისად, 63 და 37% შეადგინა. სურსათის წილმა საქონელზე გაწეულ ჯამურ უნაღდო დანახარჯებში ყველაზე მაღალი წილი დაიკავა და 44%-ს გაუტოლდა“, - ვკითხულობთ „თიბისი კაპიტალის“ პუბლიკაციაში.
